Lo inicia accion pa retira vehiculonan bandona for di caminda publico

Doño tin un siman di tempo

ORANJESTAD (AAN): Gobierno di Aruba, hunto cu Korps Politie Aruba (KPA) y diferente instancia concerni, ta inicia un accion coordina pa atende e problema di vehiculonan abandona cu pa tempo largo ta ocupa caminda y espacio publico. E accion lo cuminsa na Oranjestad y posteriormente tin intencion pa amplia e iniciativa gradualmente pa otro areanan di Aruba.

E anuncio, haci durante conferencia di prensa cu participacion di Korpschef Ramon Arnhem, Miguel Wever Coordinador pa Ministerio di Asuntonan General y Win Werleman di Serlimar.

Segun Korpschef Arnhem, durante e ultimo periodo diferente vehiculo bandona a wordo identifica, incluyendo autonan cu no tin plachi number y cu pa tempo considerabel ta para banda di caminda of riba tereno habri.

“Nos no kier e imagen aki mas. E no ta duna un bon imagen pa nos isla,” Arnhem a indica. Ademas di aspecto visual, el a señala cu luganan descuida y desperdicio acumula por crea condicionnan cu no ta contribui na un ambiente ordena y sigur.

Ultimo oportunidad pa doñonan di vehiculo

Prome cu pasa pa retiro, KPA ta brinda doñonan di e vehiculonan un ultimo oportunidad pa tuma nan responsabilidad.

Korpschef Arnhem a confirma cu e periodo di aviso ta core te 23 di september. For di 24 di september, autoridad lo pasa pa accion concreto y vehiculonan bandona identifica lo ta retira.

“Si ta bo auto, tuma bo responsabilidad,” Arnhem a enfatisa.

Segun Korpschef, KPA tin posibilidad pa haci investigacion pa determina ken ta doño di un vehiculo, hasta den casonan caminda e auto no tin number. E gastonan relaciona cu retiro y e proceso consecuente lo ta riba cuenta di e doño di e vehiculo.

Prome fase na Oranjestad

Miguel Wever a splica cu e situacion ya ta bou di observacion pa algun luna y cu diferente vehiculo ta identifica den y rond di centro di Oranjestad.

E accion ta conecta cu e esfuersonan pa haci limpia, mantene y revitalisa centro di ciudad, incluyendo Caya Grandi y cayanan den su cercania.

E prome fase lo funciona tambe como un proyecto piloto. E intencion ta pa evalua e proceso, atende eventual obstaculonan y despues sigui gradualmente cu otro area. “Aruba no ta solamente Oranjestad.”

Auto abandona ta atrae mas desperdicio

For di perspectiva di Serlimar, Win Werleman a destaca cu vehiculonan bandona frecuentemente ta bira un punto caminda otro desperdicio ta acumula.

Durante trabou y bishitanan den diferente bario, Serlimar ta topa cu situacionnan caminda desperdicio ta tira rond di vehiculonan cu ta para pa tempo largo. Esaki no solamente ta afecta imagen di e area, sino por crea problema di higiene y atrae plaga.

Werleman a conecta e accion cu e esfuerso mas amplio di Cuida Aruba y cu responsabilidad comparti pa mantene nos barionan limpi. Segun Werleman, tin hopi ciudadano cu ta coopera y cu ta mantene nan area den bon condicion, pero ainda tin trabou pa haci pa crea un cambio duradero den actitud.

Cu e accion nobo, Gobierno, KPA y e instancianan envolvi kier manda un señal cla: caminda y espacio publico no ta luga pa laga vehiculo bandona indefinidamente.

E yamada na doñonan ta p’esey pa uza e ultimo dianan di aviso pa kita nan vehiculo boluntariamente y evita gasto adicional.

For di 24 di september, e accion di retiro lo cuminsa na Oranjestad, cu intencion pa posteriormente sigui den otro areanan di Aruba.