Investigacion na Maxime Night Club relaciona cu posibel contrabando di hende

Razzia teni Diamars anochi den Kruisweg na Playa

• Cuatro muhe a wordo interoga 

ORANJESTAD (AAN): Den cuadro di un investigacion penal andando, Unidad di Traficacion y Contrabanda di Hende (UMM) a tene riba Diamars 15 di September un razzia na Maxime Night Club, situa na Kruisweg den Oranjestad.

   UMM a ricibi asistencia di e Entrada Hudicial aki, di UGC (Unidad di Crimen Organiza), BFO (Bureau Financieel Onderzoek) y polis technico. A confisca administracion, cargadonan di informacion y un suma di placa. No a haci ningun detencion y esey tabata pa rason cu e team investigativo ta ainda analisando tur informacion cu a wordo colecciona.

    Durante e entrada hudicial a topa cu 4 hende muhe posibelmente haciendo trabao di prostitucion y un trahado femenino tras di bar cu no tabata tin permisonan valido cu ta rekeri pa por traha. E personanan aki a wordo transporta y siguientemente scucha pa e team investigativo di UMM. Nan no a wordo interoga como sospechoso y tampoco nan no a wordo deteni.

   E investigacion ta dirigi riba, entre otro, posibel hechonan castigabel relaciona cu contrabanda di hende y cu pone personanan labora ilegalmente.

   E investigacion ta keto bay den pleno desaroyo. Na e momento aki no por duna mas detaye.

   Polis ta sigui comprometi den e lucha contra traficacion di hende y contrabanda di hende y ta haci un yamada na victimanan o testigonan pa tuma contacto via tipline 111-41, y corda cu nan ta garantiza bo anonimidad.