Boto a dal 2 turista na Tres Trapi y despues djis move desaparece

Caso riba Diaranson atardi

ORANJESTAD (AAN): Tabata Diaranson atardi, cu Central di Polis a dirigi patruya rumbo pa e area di landa na Tres Trapi, poco panort di Malmok pa un caso serio cu a socede ey den lama.  Na mesun momento Centro di Alarma na su turno a dirigi Ambulance pa eynan tambe.

   E unidad di Polis cu a yega, a bin haya dos persona herida.  Uno ta un señora, y e otro ta su yiu muhe teenager, kende ta parce di ta esun cu a ricibi mas golpi.

   Un unidad di Rapid Responder di ImSan tambe a yega pa duna un man.  A sali na cla cu e dos personanan aki ta turista, y tabata gozando di dushi lama riba e atardi aki, y tabata landa den e ‘Zona Protehi’, unda botonan no mag di yega cerca.

   Aparentemente un operador di boto toch a yega basta cerca, y pa su ignorancia e capitan a slow down su movimento, pero toch a dal e teenager femenino, y tambe e señora mama.  Aunke nan a grita di dolor y e impacto a sona na e boto, e capitan a djis bira cara wak patras, y despues djis primi throttle y bay rumbo lama bek zuid.

   E mucha muhe teenager y su mama a logra yega bek tera, y esnan eybanda a core bati alarma.

   Paramediconan a yega, y mesora a traha pa stabiliza e mucha muhe kende ta parce di tin como 14 aña di edad.  Siguiendo tur paso necesario pa evita di haya mas dificultad cu nan curpa, a hiba ambos den Ambulance y a sali pa Servicio di Emergencia pa atende cu nan.

   Cualkier persona cu tin informacion ta ki boto a comete e fayo grave aki, ta ser pidi pa yama Tipline di Polis na 111-41 pa asina yuda cu e investigacion aki.  No ta conoci con grave e heridanan di e teenager y tampoco di e mama ta.