Accident a cobra bida di hoben Colombiano di 24 aña

Boltermento violento den pickup cerca di costa

• E di tres morto den trafico pa 2025
• Dos persona mas a keda herida 

ORANJESTAD (AAN): Loke a socede Diaranson mainta riba e caminda di santo cu tin pariba di Prison di KIA rumbo pa Grapefield, tabata un boltermento cu por wordo describi como uno violento.  Un Nissan Pickup 4x4 color shinishi scur cu number A-52117 cu un persona tras di stuur, y dos pasahero hunto cu ne, a bolter na numeroso ocasion, y posiblemente a saca un of mas ocupante.

   E prome yamadanan a drenta na Emergencia 911, unda hendenan a bin haya un area yena cu material di e vehiculo, y mas dilanti e Nissan Pickup mes bek riba su cuatro wielnan, cu dak machica di banda, y cu tin 3 hende herida, di cual uno ta basta grave.  A bin nota un trapi tambe cu a manera keda ‘claba’ den santo y a keda para.

   Centro di Alarma cu ta atende yamadanan di 911, mesora a transmiti e detaye aki pa Central di Polis, cu e nota cu ta trata aki di un accident basta grave.  Esaki a pone cu mesora a dirigi patruyanan di San Nicolas rumbo pa e sector pa mira kico a pasa.  A manda Specialista di Trafico tambe pa e lugar.

   Na su turno, Centro di Alarma tambe a manda 3 unidad di Ambulance, fuera 2 vehiculo di Rapid-Responder pa bay brinda asistencia.

   Vocero di Polis, Liliana Rasmijn, a confirma cu ta pa 8:30 am, Central di Polis a haya e notificacion.  E cantidad di patruyanan, y tambe unidad di Ambulance bayendo pa e lugar, a alarma bastante esnan cu ta biba den area di Lago Heights y De Vuyst a hala atencion di habitantenan.

   Polis a nota cu ademas di e 2 heridonan masculino, tin un persona masculino tambe abao riba suela cu no ta duna reaccion.  E prome unidad di Ambulance mesora a bay pa e persona aki benta eybao, pero for di prome bista caba a nota cu e no tin señal vital mas.  Nan a indica cu tin di yama Docter pa bin eynan.

    Ora cu e mensahe aki a wordo pasa pa Central di Polis, mesora a core notifica demas autoridad halto.  Aki ta unda cu Altocomisario Arnhem tambe a acudi na e lugar.  Polis a manda personal di Bureau Slachtofferhulp tambe.

   Docter Forensico di Polis a yega y a constata morto di e hoben Pedro Manuel Ochoa Gutierrez, naci na Santa Marta (Colombia) dia 29 Mei 2001, pues tin 24 aña di edad.

   E dos otro victimanan den e pick-up a wordo transporta pa ambulance mirando cu nan tabata levemente herida.

  Awor Departamento di Trafico ta esun encarga pa investiga e accident, y scucha di e dos heridanan ta kico realmente a socede, y cu a laga e Pickup destrui na final.

   DIARIO como tambe Cuerpo Policial ta manda palabra di profundo condolencia na famia di e fayecido.