Thomas Ruiz, secretario di VRA:
- Situacion den trafico bayendo di Guatemala pa Guatepeor
ORANJESTAD (AAN): Secretario di Vereniging Rijscholen Aruba (VRA), señor Thomas Ruiz, a sigui relata den entrevista cu DIARIO, cu tin hopi cos cu ta pasando cu trafico, cu mester wordo drecha pa por baha e cantidad di accidentenan y tambe drecha e conocementonan, en general, di tur e manehadornan.
Ruiz a bisa cu mester tin suficiente control den trafico, y polis ta haci su best, pero no tin suficiente man pa hacie. Solucion tin, el a señala, por ehemplo e personal di Bureau City Inspector tin añanan ta warda riba e opleiding pa nan tambe por yuda den e control di trafico, y tambe e personal di Aruparking of DTP. Solucion tin, pero nada ta wordo haci.
“Nos ta bisa cu nos tin cu traha riba e conocemento di e manehador y concientiza e hendenan aki, cu nan ta chauffeur di auto, nan ta doño di auto, pero nan no ta doño di e trafico, bo ta parti di dje. E ciclista y e peaton tin mesun derecho cu bo, y bo tin cu respet’e. Nos ta coriendo ‘a lo loco’ akinan”, Thomas Ruiz a subraya.
El a agrega cu mester corda cu ta bin un super hotel na San Nicolas, y lo tin mas informacion di trafico pariba. “Dus, e cos aki ta bay bira un problema, nos mester traha cu vision, nos no mester warda te ora e baca hoga pa drempel e pos”, segun Thomas Ruiz.
Asociacion VRA ta wardando ainda riba e invitacion di Minister di Husticia y Parlamento, pa sinta na mesa y trata e asunto aki, na su opinion, urgentemente! E situacion aki ta bayendo di Guatemala pa Guatepeor, y solamente sintando, dialogando y bin cu consensus y vision, por drecha esaki; si no, e ta keda bay atras, señor Thomas Ruiz, Secretario di VRA, a reitera.
