Problema na Tamarijn a finalisa cu 2 homber deteni

Dama transporta pa Hospital

ORANJESTAD (AAN): Tabata recien den oranan di anochi, cu Central di Polis a manda unidad di Santa Cruz rumbo pa un adres na Tamarijn, unda un problema ta escalando.

   Na caminda pa e adres na Tamarijn, Polis a ricibi extra informacion, esta cu un señora a haya golpi.

   Ora cu e patruya di Polis di Santa Cruz a yega na e adres, nan a bin nota un situacion cu ta indica un caso di maltrato severo.  Pasobra aki a bin ripara cu e victima femenino, a keda cu su brasa fractura.  Pa esaki mesora a pidi presencia di Ambulans.

   Polisnan a cuminsa busca informacion di loke por a socede.  Asina nan a tende cu dos homber a haya problema na e adres ey.  E discusion a escala te cu dado momento un di e hombernan a pasa man pa un baranca y a cuminsa zwaai pa dal e casa di e señora cune.  E señora e ora a core bay para dilanti di su casa pa defende.

   Consecuentemente e baranca a dal e señora fueremente, y lo a kibra weso.

   E pareha a mira con su señora a keda herida, y el a pasa man pa un hark y a ataca e homber agresor cu esaki.

   Ora cu Ambulans a yega, e Paramediconan a atende e señora, y mirando e nivel di fractura, nan a haya necesario pa bay cune urgentemente pa Hospital pa intervencion rapido.

   Debi na e maltrato severo aki, Polis a haya necesario pa detene ambos homber.  Tur dos a entrega keho contra otro.