Bashamento di tiro den Mandolinstraat a laga teenager den situacion critico

Caso serio bao investigacion

ORANJESTAD (AAN): Tabata Diamars marduga banda di 1:28 am, cu Central di Polis a manda unidadnan di Polis di Playa pa acudi cu urgencia na un adres den Mandolinstraat na Tarabana, como tiro a wordo scucha y un hoben a keda herida.

   Inmediatamente unidadnan di Polis a mobilisa pa e caya, mientras cu Centro di Alarma na su turno a saca unidad di Ambulans pa e adres.

   E prome unidad di Polis a yega basta rapido na e cas, y a bin topa cu un grupo di persona basta emociona den e cura di cas aki na Mandolinstraat.  Nan a core informa Polis cu e hoben di como 17 aña di edad a ricibi impacto di bala na altura di su abdomen.  Polis a nota cu e tin mancha di sanger na su barica.

   Mientras cu tabata sperando yegada di Ambulans, e personanan a splica cu e hoben aki tabata pafo den su cura di cas, ora cu diripiente un auto parecido na un Kia Rio color shinishi ta esun cu a pasa pafo riba caya, y den estilo di ‘drive-by shooting’, a los posiblemente 2 pa 3 tiro riba e hoben.

   Ora cu Ambulans a yega, Paramediconan a check e situacion y a indica cu nan tin di bay urgencia cu e hoben, pasobra tin di bay actua pa check ki organonan por a wordo perfora door di e impacto di bala, y asina traha mesora pa stop cualkier hemoragia interno.

   Un otro Ambulans mas a yega djis por si acaso, pero e prome unidad mes a pone e victima riba brancard, y mientras famia y amigonan tabata duna e hoben mensahe di forza, el a wordo hisa y poni den Ambulans pa asina sali cune cu urgencia.

   Mientras tanto informacion di e Kia Rio shinishi a wordo duna riba Tetra-Radio pa demas unidadnan riba caya pa nan busca rond den e area.  Agentenan policial pafo riba caya usando flashlight y lusnan di vehiculonan, a cuminsa busca y a logra tambe haya huls, net parti pafo di e cura di cas.  Aki a manda busca team forensico di BFTO pa bin recoge nan di eybao, y a pone Recherche di Playa na altura.

   Como cu e grupo di persona a keda hopi emociona, y tambe disgusta cu e tiramento, a busca presencia di Bureau Slachtofferhulp pa bin duna un man.

   Mientras tanto, vocero policial Liliana Rasmijn a confirma cu na Hospital, e hoben teenager a keda hospitalisa y cu su situacion ta critico, pero stabil.

   Recherche su atencion ta pa busca forma pa localisa e Kia Rio aki, y si acaso nan tin suerte, varios Security Camera instala na puntonan clave lo por a capta dicho vehiculo.

   Polis ta pidi tur hende cu por tin informacion, pa por fabor yama Tipline di Polis na 111-41 pa asina duna informacion.  Corda cu bo por keda anonimo.