ORANJESTAD (AAN): Diadomingo marduga banda di 3:10 am, net ora cu unidad di Polis di Noord ta pasando riba caminda di Shaba,
nan a mira un auto Mitsubishi Lancer color preto ta bayendo nort den area di Super Do It Center. Nan bista a bay riba dje, como cu e auto ta moviendo zig-zag riba caminda.
Polisnan a bay y a duna e persona tras di stuur un señal pa stop. E persona aki a stop su auto den cura di un cas na Montaña, a habri porta y baha di su auto. Aki bista di Polis a bay riba su forma di para riba su pianan, como cu e no por para drechi. Ora di bay papia cune, e compay tabatin lenga pisa, tin reaccion lento, y su aliento ta hole fuerte na alcohol di uso interno.
Polis a ilumina parti paden di su auto, y a mira varios boter bashi di cerbez, y un boter di licor fuerte na e piso dilanti e asiento di pasahero. Fuera di tur esaki, Polis tabata haya holor fuerte di marihuana ta sali di e auto.
Y riba e asiento di pasahero dilanti tabatin varios resto di yerba di marihuana.
Polis a puntre pa mira su rijbewijs, pero aki el a bin cu e storia cu e ta bayendo rumbo pa cas di su amiga. El a caba di bisa esey y a djis cuminsa cana bay direccion di e cas. Agentenan a cana su tras, pero un rato despues a perd’e for di bista ora cu el a bay cana patras di e cas. Diripiente Polis a tende un golpi duro, y a check rond pero no por a mira e persona.
Polisnan a dicidi na bati na e porta di e cas pa check si berdad su amiga ta biba eynan. Aki e habitante a spierta y atende Polis, y el a declara cu e no conoce ningun hende cu ta doño di e Mitsubishi Lancer preto ey, y cu e auto ta riba su tereno sin su permiso.
Agentenan a laga check e plachi di number via Computer di DIMP. A sali na cla cu e plachi ey ta pertenece na un otro vehiculo, esta un Ford F-350 Heavy Duty Pickup.
Como cu a haya resto di marihuana riba e asiento, cu holor fuerte di marihuana, Polis a dicidi na bay listra e auto mas. Den e middleconsole a bin topa cu un paspoort Hulandes cu nomber di e homber di inicial T. Via e pasfoto riba e paspoort, Polis a ripara cu esey mes ta e homber cu tabata coriendo e auto.
Den e dashboard, Polis a haya un balansa electronico, y un Zorgpas di AZV di e manehador. Bao di e asiento banda drechi dilanti, Polisa haya un caha di carton color geel, incluyendo un sakito transparente di plastico cu den dje marihuana, un grinder di plastico, y un paki di papel pa lora cigaria. Den e auto mes no por haya ningun documento di e auto. Tambe a haya un tablet computer.
Polis a confisca e auto, y cu Takelwagen esaki a wordo hiba pa Warda di Polis. Tur droga y atributo haya, lo wordo entrega na Unit Narcotica.
E auto por wordo duna bek, solamente ora cu bin cu tur documento di DIMP, Aseguro, DTI, y paga tambe e gasto di Takelwagen.
