Auto a dal ciclista femenino y lage den estado critico

Accident mainta trempan na Zeewijk

ORANJESTAD (AAN): Central di Polis riba Diabierna mainta trempan a core manda patruya di San Nicolas rumbo pa e area pazuid di e Santana na Zeewijk, como cu un vehiculo Dodge Ram pickup a dal un ciclista femenino.

   Polis a yega y bin haya un Dodge Ram pickup A-258 para na banda, y e bicicleta tur dobla benta abao.  Mesora Ambulans tambe a ser manda. Nan a yega y topa cu un señora ariba caminda victima di e accident aki. E situacion di e señora tabata serio. Paramediconan a prepara e señora ya cu el a ricibi hopi golpi, y asina cu urgencia a sali direccion Hospital cu e señora di 47 aña.

   Na Hospitaal tabatin un team cla wardando e victima. Despues di tratamento specialisa e la wordo interna den Unidad di Intensive Care, unda cu ta monitoriando su situacion cu ta grave.

   Specialista di Trafico, hunto cu team forensico di BFTO a presenta pazuid di e santana pa haci nan investigacion.  No tin mucho claridad con e accident a sosode. Na e luga por a mira zapato y algun pertenencia di e victima cu a keda atras despues di e accident.