Auto a dal y laga peaton critico den De La Sallestraat  

ORANJESTAD (AAN): Diahuebs atardi den e momento di 'rush hour' riba De La Sallestraat, a registra un accident net na e cruzada cu Indianenweg, net dilanti di Watergate.

   Un peaton di edad grandi a bay cruza e caya aki, net ora cu un sedan Kia Rio color blanco cu number A-67679 tabata bayendo direccion pabao.

   E auto a dal e persona masculino cu tabata cruzando caya cu su garoti, y debi na impacto el a pasa riba e hood y bay dal cu cabez den windshield, pa despues bons y bay cay abao.  E persona mesora a cuminza grita di dolor eybao benta, y sanger a cuminza sali di herida.

   Central di Polis a ricibi numeroso yamada e momento ey, y mesora a dirigi diferente unidad di Polis di Playa, y tambe a notifica Centro di Alarma pa asina despacha un Ambulance.  Algun hende eybanda a dicidi na yuda cu un cusinchi pa suavisa e curpa di e asfalt cayente eybao.  E cusinchi a mancha casi completamente cu sanger.

   Polisnan mesora a cera e caya eybanda pa asina duna espacio pa Paramediconan haci e trabao.  Nan a haya e peaton benta di banda abao riba caminda, sclamando di dolor, y ta mustra di ta basta critico.  Asina mes di banda, nan a pone riba brancard, pa poco-poco pone drumi cara na halto, y asina mara su curpa y su cabez bon cu brace, y asina bay cune cu urgencia pa Servicio di Emergencia na Hospital.

   Ban poco poco riba caya!  Esaki a bira e di dos caso di auto ta dal peaton na Playa e siman aki.