Auto a dal peaton y lag’e cu golpi serio na cabez

ORANJESTAD (AAN): Diasabra algo pasa di 7:30 pm, Central di Polis a core manda patruyanan di Playa rumbo pa Avenida Alo Tromp como cu auto a dal un peaton.

   Ora cu Polis a yega, nan a bin haya e victima mey-mey di e caminda, net un poco pariba di Cas di Partido.  A core pidi presencia di Ambulance cu maximo urgencia.  Polis a nota cu e persona victima masculino a ricibi basta golpi serio na cabez.

   Na e lugar aki Polis a nota cu no ta trata di un auto, sino mas bien di un Micro-Van cu a keda para eybanda.  Testigonan a bisa cu e Micro-Van aki a caba di sali di un cas eybanda mes, y pa un of otro motibo no a mira e peaton y a dal’e.

   Ambulance a yega y mesora Paramediconan a check e prome señalnan vital di e victima, y nan a sinti cu e situacion ta serio, y cu tin di bay cu urgencia rumbo pa Servicio di Emergencia di Hospital.  Polis tambe a seya e lugar di accident, sperando Specialista di Trafico pa yega.

   Rapidamente e ambulance a sali direccion Hospital cu e victima pa tratamento medico.