Hues no ta haya proba intento di mata
ORANJESTAD (AAN): E homber J.P. di 30 aña biba na Hulanda a presenta recien den sala di Corte pa scucha su sentencia. Por a nota cu J.P., kende tabata encarcela, a wordo laga liber. Esey ta nifica cu Hues no ta comparti e exigencia di Fiscal.
Ta asina cu Fiscal a acusa J.P. di a purba di mata, a purba di haci daño severo riba un agente di Polis. Tambe Fiscal a acusa J.P. di posecion di droga.
Fiscal a exigi 18 luna di prison: Dia 4 April 2025 tratamento di e caso a tuma lugar caminda Fiscal a bisa cu e ta haya cu riba 17 October 2024, J.P. a purba mata un agente di Polis cu auto. Na opinion di Fiscal, door cu e agente a bula un banda, e auto na a dal e agente di Polis.
Fiscal a remarca cu na Hulanda, J.P. tin un carchi di castigo hopi largo. El a mustra cu na 2016 caba, Corte na Hulanda a condena J.P. na 6 aña di prison pa intento di mata. Fiscal a sigui bisa cu J.P. tambe tin condena pa droga.
Fiscal ta considera J.P. un residivista. Fiscal a mustra cu den un caso na Aruba, caminda hende a manda auto riba un Polis, a wordo condena na 15 luna di prison. Fiscal a exigi 18 luna di prison pa J.P. Fiscal a bisa cu e droga lo wordo destrui. E cellular y placa lo mester wordo debolbe.
No proba intento di mata: Hues a bisa cu e no ta haya prueba cu J.P. a purba di mata e agente di Polis pero si cu J.P. a purba di causa herida severo na e agente di Polis. E momento aki por a mira cu J.P. a cuminsa bati man mustrando cu e ta contento cu e decision di Hues. Guardia di Corte a bisa J.P. pa e sinta keto y no bati man. Hues a splica cu e no ta haya cu J.P. tabata core cu velocidad halto y bay cu velocidad halto riba e agente. Hues a bisa cu e ta haya prueba cu J.P. tabatin droga den e auto.
Stroba polis haci su trabao: Pa cu e castigo, Hues a bisa cu e ta tene cuenta cu J.P. a bay cu e auto riba e agente di Polis. Hues ta haya cu esaki ta mina trabao di Polis. Hues a tuma J.P. na malo pa esaki.
Tambe Hues a tene na cuenta cu J.P. tabatin cocaina cu ne.
Castigo combina: Hues a condena J.P. na 12 luna di prison di cual 6 luna ta condicional cu un tempo di prueba di 2 aña. Hues a bisa cu el a duna orden pa laga J.P. sali liber tempran, pasobra Hues ta haya cu ya caba J.P. a sinta suficiente castigo.
