Auto a bay dal riba ‘Rotonde di Turtuga’ na Eagle Beach  

ORANJESTAD (AAN): Den oranan di atardi yamadanan a drenta na Central di Polis, indicando cu riba Irausquin Boulevard na e rotonde panort di Amsterdam Manor tin un accident.

   E unidad di Polis cu a yega eynan, a bin haya un auto compacto Kia Picanto color blanco cu number A-38489 basta kibra riba e rotonde.  Esaki ta e rotonde di e monumento di Turtuga Driekiel.  E auto tabata bin for di Highrise Hotels bayendo zuid, y esencial ta cu e no a dal riba e monumento di brons di 2.000 kilo aki, crea pa artista Gilbert Senchi, pero si e auto a dal fuerte iba e acera cu tin rond di dje.

   Autoridad a compronde di e chauffeur masculino, cu net e ta yegando e rotonde aki cu el a pega soño.  Pues e auto a keda core bay dilanti, cruza y dal e rotonde, kibra parti di muraya y bay riba un semi plataforma eynan.  Como cu el a dal y pusha un baranca, e parti dilanti y abao di su motor a sufri daño considerabel, y piezanan a djis sali cay eynan.

   A puntra e chauffeur si acaso el a sufri herida, pero el a bisa cu e ta bon y no mester di Ambulans.  A manda busca Forensys na e lugar pa asina atende e caso aki pa Aseguro.