Accident na Sero Blanco
ORANJESTAD (AAN): Tabata Diadomingo dia 26 di Juli 2026, alrededor di pa mas o menos 4:30 di atardi central di polis ta wordo notifica di un accidente na Seroe Blanco
E prome informe ta cu un señora manehando un Ford Fusion color blanco pa un of otro motibo a baha di caminda, y dal violentamente contra e pilar di cura di un cas y a keda herida.
Central di polis ta despacha patruya di polis y ambulance na e lugar di e sucedido.
Ora cu Polis di Playa a yega na e adres cu a resulta di ta den Regents Park, a bin topa cu e señora den e auto sedan Ford Fusion color blanco di cuatro porta cu number A-28017. Tabata parce cu e dama chauffeur a bira malo tras di stuur, y debi na esey a bay un banda di caya, dal den acera, y esaki a pone e auto bons bay bek otro banda, subi acera y dal den e cura di cas. E pilar a casi keda intacto, ta muraya chikito banda di e pilar a kibra. E impacto a pone cu parti grandi di e auto a kibra, aunke crumple-zones a evita cu e cabina paden a haya daño.
Pero e chauffeur lo a dal cu su cabez duro den e auto. Ambulance a presenta y Paramediconan a stabilisa e victima y transporte pa Servicio di Emergencia na Hospital pa haya asistencia medico avansa. Polis di trafico a presenta pa asina haci nan investigacion.
Pero un poco di diesdos ora despues, esta riba Dialuna mainta polis di trafico ta wordo informa dor di personal di hospital cu lamentablemente e señora a fayece.
Dokter na Hospital ta constata morto di e señora Olga Denise Lampe naci na Aruba dia 10 di April 1942, pues tin 84 aña di edad.
DIARIO y tambe Cuerpo Policial Aruba ta manda palabra di condolencia na famia di e fayecido.
