Dos weekend pasa tabata ATM di Aruba Bank
ORANJESTAD (AAN): E ta algo cu a cuminza dos siman pasa, esta Diabierna marduga dia 17 di Juli 2026, ora cu alarma a wordo bati instantaneamente na momento cu e mashin sofistica di ATM Smart Deposit di Aruba Bank na Paradera a detecta actonan inusual na e aparato.
A resulta cu anti-social(nan) a pensa cu lo ta facil pa forza y horta for di e aparato aki, cu clientenan ta uza pa deposita placa sea Florin of Dollars. Nan a focus riba e porta mas pafo, cu tin bao di e pantaya y keyboard.
Cu esfuerzo nan a logra habri e porta ey. Pero pa nan sorpresa, e ladronnan a bin topa cu un porta paden cu ta mas bien parce di ta un tanki di guera reforza. Ni maske kico nan a haci, e porta aki ta un di e nivelnan di mas halto di proteccion cu e aparato aki ta dispone di dje.
Pues nan no a logra, pero a laga daño cometi na e aparato. E mesun mainta pa merdia, ya caba tecniconan a uza pieza extra cu nan tin pa asina a pone e mashin funciona bek mesun Diabierna atardi.
Awor ta dos otro ATM: Awor a sali na cla cu den fin di siman cu a pasa, anti-socialnan a bay purba nan suerte cu dos otro ATM Machine.
Atrobe a acudi na Paradera, pero a bay na e vestibulo di CMB Bank cu tin net pazuid di MFA Paradera riba caminda grandi. Aki a purba forza e mashin aki, y aparentemente ainda nan a pensa cu e aparatonan aki ta facil pa kibra y drenta den nan.
Na e mashin na Paradera nan no a logra, pero den e intento a comete algun destruccion na e aparato.
Despues di esey, a acudi na e ATM Machine di CMB Bank cu tin den e vestibulo na Tanki Leendert, den mesun edificio grandi di Digicel. Aki atrobe a purba di forza e aparato di placa, pero no a logra. Y a bay lagando destruccion atras.
DIARIO a compronde cu autoridadnan hudicial ta investigando e casonan aki, y ta parce cu ta un ‘trend’ nobo esaki a bira. Den menos di 2 siman, esaki ta di tres aparato cu a purba na forza y kibra den nan.
Debi na destruccion, CMB Bank a haya nan ta cera temporalmente e ATM Machine di Paradera y tambe esun di Tanki Leendert debi cu mester busca pieza pa haci reparacion. Pero riba Dialuna ya caba esun di Tanki Leendert a habri bek pa duna servicio. Pero manera por mira riba e potret, esun di CMB Bank na Paradera keto bay ta cera.
Un suplica, na cualkier persona cu por a mira algo socede marduga na e mashinnan di ATM aki, pa yama Tipline di Polis na 111-41 pa yuda autoridad den e investigacion.
