Atracadornan a usa liquido di pepper pa atraco na Botanica di Loteria

Caso serio na Paradera

ORANJESTAD (AAN): Tabata Diabierna anochi cu dos hende anti-social a dicidi na comete atraco riba un botanica di Loteria, cu ta situa net riba tereno di e cas Paradera 130-A.

   E dos atracadornan aki a presenta di forma sorpresivo riba e dama cu e anochi ey tabata bende number pa diferente loteria.  Tin di tuma nota cu e negoshi aki di botanica Gran Suerte, no ta un rebendedor di Lotto pa Deporte.

   Un di e atracadornan tabatin su cara full tapa cu paña preto, y e mes ta full bisti na preto.  E otro atracador e no a logra mira.  Esey ta debi cu e atracador a saca un bleki chikito y a spuit e contenido den su cara.  Ta trata aki di un material di defensa personal conoci como ‘Pepper-Spray’.

   E liquido aki traha cu pepper, a pone e dama sinti instantaneamente dolor inmenso na su wowonan, cu mesora ta yena cu lagrima y haci dolor.  Resultado di esey ta cu bo ta cera bo wowonan como impulso riba e dolor.  Debi na esey e no por a mira e otro atracador ta con e ta bisti.  Loke si el a ripara ta cu e otro atracador a pasa su man door di e bentana, y asina a rek y gara e tas cu e tabatin e placa di benta di dia aden.

   Esey ta debi cu e momentonan ey e negoshi ta cerando, y e tin e placa poni den su tas cla pa cera e Botanica.

   Door di e dolor aki, el a cay abao na suela y grita pa auxilio.  Mientras tanto e atracadornan mes a core bandona e area.

   E yamada mes a drenta pa 8:26 pm na Central di Polis pa avisa di e atraco na e botanica ‘Gran Suerte’.  Mesora unidadnan di Polis di Santa Cruz como tambe di Oranjestad a cuminza mobiliza pa e area aki, cu ta situa net un tiki pabao di MFA Paradera na otro banda di caminda.

   Despues informe a drenta cu e dama ta herida, y pesey a pidi presencia di Ambulans tambe.

   Vocero di Polis, Lilian Rasmijn a confirma cu momento cu Polis a yega na botanica Gran Suerte, nan a haya e dama benta abao.  Mesora el a splica cu un rato prome dos atracador a spuit Pepper-Spray den su cara, y a bay cu e tas di placa.

   El a bisa cu den e tas tin como 1.000 Florin, y tambe placa larga.

   Mesora a pidi presencia di Atraco Team pa yega na e lugar pa investiga e caso.  Como cu e dama su wowonan no por a mira mas pa algun minuut, e no sa si e atracadornan a baha na awa sea na pia, of a subi auto eybanda.  Unidad di Polis a acudi na un Supermarket nobo cu a habri otro banda di caminda pa asina revisa Security Camera Video pa mira si acaso e lo por a capta algo di e atraco.

   Ambulans a yega y a duna prome auxilio na e dama pa asina purba na alivia e wowo cu poco-poco di su mes ta spula e liquido for di e wowonan.

   Pa sosten na e dama, a pidi Bureau Slachtofferhulp tambe pa bin duna asistencia na e caso aki.  Polis awor tin e caso bao investigacion.  Un suplica ta bay na publico, si acaso bo tin informacion of a mira algo, por yama Tipline di Polis na 111-41.