ORANJESTAD (AAN): Diasabra anochi pa Diadomingo madruga, e cantidad di hendenan cu a keda deteni na Playa durante e Parada Nacional di Luz, a yega un total di 31 persona.
No ta djis hende burachi so a wordo deteni. Djis cualkier persona cu no a sigui ordo di Polis, of no a cumpli cu orden pa hala un banda, a wordo deteni.
Personal di Recherche cu tabata encarga cu e ristamento preventivo tambe a produci algun detencion.
Vocero Policial Lito Lacle a splica, cu for di 31 detencion, finalmente un total di 5 hende homber a keda cera pendiente di mas investigacion.
E sospechoso di inicial D.S.X.S. di 33 aña naci na Aruba, a wordo deteni pasobra el a menaza un polis. Pa colmo, durante listramento a haya ariba dje un arma di bringamento cu yama “skinops” (conoci na Hulandes como ‘boksbeugel’). Ademas cu el a keda deteni, autoridad y a confisca esaki.
Esey nifica cu e homber aki a subi caya riba Diasabra cu e skinops den su poder, cu posible mal intencion. E potret por mira e skinops cu a wordo confisca di e homber.
Ademas di e homber ey, Polisnan a encarcela e siguiente 3 sospechosonan tambe. Nan a keda cera pa “Openlijk Geweldpleging” (Bringa den grupo den publico): E homber M.A.O. di 22 aña naci na Aruba, e homber P.A.K. di 16 aña naci na Aruba, y e homber D.D.C. di 18 aña naci na Aruba.
Polis a encarcela e homber S.S.C.J.K. di 20 aña naci na Aruba, kende a keda cera pendiente mas investigacion pa maltrato di un polis.
Sigur ta riparable e edadnan hoben cu comportacion no mucho bon, y cu awor mester atende cu departamento di Recherche cu ta encarga cu e investigacion.
Un mensahe pa nos hobennan no cay den man di husticia, bo ta un hoben bo tin futuro bo. Bo tin cu desaroya y sigui crece, no cay den mal caminda y bay tras di trali!
