Alto Comisario Tjon-Kock a pidi tur Polis pa coopera y pa tuma nan vacuna

ORANJESTAD (AAN):  Alto Comisario Vanessa Tjon-Kock a haci un apelacion na su coleganan trahando den Cuerpo Policial.

El a bisa cu e kier stimula su coleganan cu tampoco no a haci uso di e vacuna contra Covid-19 "pa por fabor pensa esaki bon. Abo tambe ta biba ariba Aruba. Abo tambe ta forma parti di Cuerpo Policial. Abo tambe por yuda nos pa proteha nos mes. Pa proteha bo mesun famia y pa proteha tur bo sernan keri".

Tjon-Kock a pidi su coleganan pa coopera y pa tuma nan vacuna. Polisnan ta worde confronta cu e control di e medidanan cu tin actualmente y unda tur miembro di Cuerpo Policial ta coriendo un risico hopi grandi.

"Un bes mas mi ta haci e apelacion aki na nos propio miembronan pa nan tene cuenta cu esaki pa esunnan cu naturalmente a haci uso di nan derecho di no vacuna", Alto Comisario Vanessa Tjon-Kock a declara.