E prome warda di polis y voceronan policial

Cuerpo Policial 35 aniversario --  

==  E prome Warda di Polis tabata situa den centro di ciudad, unda awe nos conoce como Renaissance Hotel. Mirando cu e poblacion di Aruba no tabata grandi pero tabata den crecemento e warda di Oranjestad tabata e warda perfecto pa pais Aruba. E tempo ey e agentenan tabata tin patruya policial pero limita.

Asistencia tabata drenta na warda di Oranjestad y asina e agentenan tabata wordo informa na warda pa asina nan por sali bay brinda asistencia. Comunicacion di radio e tempo ey tambe tabata limita.

Tampoco tabata tin computer. Tur asistencia tabata bay riba un “Typewriter”, esaki nifica cu na momento cu e agente policial drenta warda bek tur datos cu el a nota den su buki e mester duna su wachtcommandant. E wachtcommandant mester type esaki uzando un "Type writer". Si e wachtcommandant mester haci un fout riba e “Type writer” e mester a cuminsa completamente di nobo. Mayoria asistencia y proceso tabata bay na man y riba “Type writer”.

VOCERONAN POLICIAL

Vocero di polis durante 35 aña ta forma parti di e organisacion. E departamento su meta ta pa informa, educa y preveni. Nan ta e cara y e personanan cu ta informa, y educa nos comunidad den diferente area. Durante 35 aña comunidad a conoce caranan cu nunca por ser lubida.

Un di nos prome vocero policial tabata Sr. Pedro mihor conoci como “Shon Pe” Krozendijk. Despues a pasa e batuta pa Sr. Edwin “Papito” Comenencia cu John Larmonie pa cu e area di prevencion.

Awendia e departamento aki ta bou encargo di Sr. Lito Lacle como vocero policial. Pa prome biaha den historia tin un hende muher como vocero suplente cu ta Sra. Liliana Rasmijn.

Pa ultimo tempo Lito cu Liliana sigur no ta personan desconoci den comunidad. Asina tambe durante tempo, hopi cambio a ser mira. Tecnologia moderno ta hunga un rol importante con pa saca e informacion pa comunidad. Pesey awendia e departamento aki ta encarga cu social media di KPA. Un pueblo bon informa ta e meta principal.