Accion relampago a yuda Polis detene tres hoben

Nan a caba di kibra un Kia Rio horta

ORANJESTAD (AAN): Tabata Diabierna anochi cu un unidad di Polis di Playa a ser manda den Luxemburgstraat na Eagle, como cu personanan a raporta na Central di Polis cu un auto a dal contra un cura di cas, y esnan aden a sali bay laga e auto.

   Ora cu Polis a yega dilanti e cas, nan a mira cu un auto sedan Kia Rio color shinishi scur cu number A-38210 a dal den e cura.  E auto a reverse bek, pero debi na daño extenso e no a core mas.  Pesey esnan den dje a core baha y ranca careda bay na pia.  Polis a ilumina e stuurwiel, y a mira cu e ignition switch ta kibra.  Polis mesora a conclui cu e auto aki a caba di wordo horta.

   Esaki ta e di tantisimo Kia horta ultimo simannan na Aruba, y tin e pensamento cu ta e trend di TikTok, esta “Kia Boys” lo por ta e motibo.  Pasobra riba TikTok ta circula video con facil bo por forsa e ignition di cierto modelo di Kia y tambe Hyundai, y cu djis un waya di charger USB di celular, bo por start e auto den par di seconde, y bay cune.  Tur esey debi cu e autonan aki no tin un sistema di ‘inmobilizer’.  Publico por djis google e palabra ‘Kia Boys’ pa haya sa mas.

   A sali na cla cu e Kia Rio aki a wordo horta Diabierna marduga.

   Polis a papia cu habitantenan di Luxemburgstraat, y nan a duna autoridad algun informacion balioso.  Pues basa riba e simple tipnan aki cu bon detaye, varios unidad di Polis a cuminsa core den e area.  Diripiente un rato despues a bin topa 3 persona hoben y cu nan a huy den un auto color cora.

   Esaki nan tabata den area di Bushiri. Agentenan mesora a hinca e puzzel den otro y a detene tur sospecha di ladronicia di auto.

  Mientrastanto Joyriding Team di Cuerpo Policial a tuma e caso over, pa asina haci un investigacion riguroso.  Nan a manda busca team forensico di BFTO tambe pa asina lanta tur vingerprint cu por a haya riba e auto horta.  Asina oficialnan hudicial lo haya sa claramente ta kende tabata coriendo den dje.

   Cu Vehiculo di Rescate, tur tres hoben a worde pa Warda, unda cu e team di joyriding lo trata cu nan.  Publico ta ser pidi pa ta cauteloso, como cu ultimo simannan, ladronicia di auto a lanta cabes atrobe, principalmente autonan di marca Kia.