Area di Urataca a keda casi 5 ora sin coriente
ORANJESTAD (AAN): Takelwagen di un compania local di Offroad Tours a pasa den situacion dificil net Diadomingo, bispo di Pasco, y debi na esaki un gran area di e.o. Urataca, Picaron, y Kas Ariba a keda sin coriente. Algun habitante a keda cu casi 5 ora sin coriente.
Ta conoci, cu pa bo lastra un vehiculo bo tin di usa un ‘strap’ cu tin un rating di 3x e peso di e vehiculo cu bo ta lastrando. E peso tipico di un Toyota Landcruiser ta di como 3.350 kilo, pues bo tin di usa un strap cu por wanta por lo menos 10.000 kilo. Un strap di 10 ton ya caba ta cay bao di categoria di ‘Heavy Duty Straps’.
E mainta aki, un Takelwagen di e compania di Offroad Tours cu sede den Schotlandstraat na Eagle tabata lastrando dos di e vehiculonan aki for di area di Parke Arikok rumbo bek pa Playa.
Un di e vehiculonan 4x4 a wordo hisa riba e flatbed di e Takelwagen, y e otro a wordo lastra patras di dje na un hitch special pa hisa e dos wielnan den halto. E dos wielnan a wordo wanta cu straps Heavy Duty color oranje. Y esaki ta e color cu ta indica cu ta trata aki di Straps cu por wanta peso di 10 ton.
Alrededor di 11:00 am, pasando door di caminda di Picaron bayendo Urataca, net cu el a caba di pasa e cas Picaron 1, subiendo e pida caminda net den birada bayendo pabao, aki algo a bay malo. Net ora cu e Takelwagen tabata yegando dilanti cas na Urataca 25, diripiente e strapnan aki di e hitch a kibra.
Esaki a pone cu e vehiculo 4x4 aki (cu mas bien ta un Toyota LandCruiser modifica cu extra asiento parti patras) lora di su mes bay abao. Bon mes cu no tabatin ningun auto of truck su tras.
E Toyota LandCruiser aki a lora di su mes na e bahada aki, pa como 45 meter y aki el a keda acelera debi na e bahada.
Cu forsa violento el a baha banda drechi di caminda, y net na e T-weg pabao di e cas Picaron 1, el a dal fuerte kibra un palo di luz grandi cu voltahe halto, riba cual tin junction pa otro palonan di luz, fuera un transformer riba dje.
Esaki a pone e palo di luz kibra den varios pida, y momento cu e transformer a cuminsa bin abao y wayanan a mishi cu otro, e transformer a produci un explosion cu vlamnan blauw cu tabata extra fuerte.
E palo di luz a bay finalisa riba e Toyota LandCruiser y e transformer net banda di dje. Wayanan a kibra tur rond, y tur sorto di isolator a kibra, sea debi na explosion of impacto, y a keda benta tur eybao na e T-weg. E T-weg aki ta como 310 meter pariba di Urataka Center.
E Takelwagen mes a keda na halto banda di Urataca 25 cu e otro Toyota LandCruiser riba e flatbed.
Polis a wordo yama, como tambe personal di NV Elmar cu a yega pa asina analisa e daño, y a nota cu aki ta bay bira un extra trabao pisa pa nan, como cu ta trata di un instalacion di voltahe halto. Extra personal mester wordo yama pa bin duna un man.
Mientras cu un ekipo a cuminsa prepara pa ora di saca e LandCruiser kibra for di bao di e palo di luz, pa haci e area limpi, un otro team di NV Elmar a cuminsa isola e area aki di coriente, pa asina duna otro zonanan coriente bek. Y ya pa 12:05 pm, e area di Kas Ariba a haya coriente bek. Pero esnan bibando cerca ey di Urataca y Picaron a keda sin coriente.
E trabao a encera kita tur e palo bieu, desconecta tur waya, kita tur daño laga di eybao, pa asina bin cu aparato pa coba buraco, pone un palo nobo di luz, instala bracket y tur componente di coriente, incluyendo un transformer nobo, y rek wayanan nobo di coriente. Trahadornan di Setar Cable Services tambe mester a yuda kita nan wayanan di TV y Cablenet. E gasto di reparacion di e palo di luz aki sigur a bira uno astronomico.
Despues di tur esey, tin di bay keur tur e instalacion, prome cu por a pone coriente bek. E ciudadanonan eybanda tabata nada contento con e accident aki a stroba nan inmensamente preparando pa Pasco.
Personal di NV Elmar tabatin un Diadomingo hopi druk, pasobra riba un solo dia un total di 3 accident a keda registra cu ta envolvi un palo di luz.
