Accident pisa registra Dialuna marduga na Bubali

Persona a keda pega bao di auto

ORANJESTAD (AAN): Tabata Dialuna marduga algo pasa di 1'or, cu Polis a bay cu urgencia na e rotonde di Super Food na Bubali como cu yamadanan a drenta cu un auto a bolter riba e rotonde, y tin hende herida.

   Unidadnan di Polis mesora a subi Avenida Nelson Oduber pa bay na e lugar di accident.  E prome patruya a bin haya un Hyundai Getz color blauw cu number A-67326 cu a kenter y keda mey-mey di e separador di e pida caminda entre Bubali y Palm Beach.

   Testigonan a bisa cu durante e boltermento, e chauffeur kizas sin seatbelt a wordo saca violentamente di e vehiculo, y na final e auto a bin cay bek riba dje.  Polis a usa nan flashlight y nota cu esey ta e caso!  Mesora a core pidi pa presencia di Ambulans, y tambe Vehiculo di Rescate di Cuerpo di Bombero.

   Bomberonan a yega rapido, y hunto a traha un plan pa alivia e chauffeur masculino for di e situacion penoso bao di e auto.  Na un forma rapido nan a sake, y mesora Paramediconan a pone riba brancard pa asina haci un triage rapido riba dje, y mirando cu su condicion ta serio, inmediatamente a dicidi cu no tin tempo pa perde, y a sali bay cune mesora pa Servicio di Emergencia di Hospital.

   Specialista di Trafico a wordo pidi, pa investiga e accidente aki, unda cu fuera di velocidad halto posiblemente tin mas factor cu a hunga un rol.