Accident fuerte na Sero Alejandro a laga motociclista den situacion critico

ORANJESTAD (AAN): Diadomingo anochi den careda di 9'or, autoridad policial a wordo informa di un accident serio di vehiculo ATV (conoci como ‘quadracer’) riba e caminda di Sero Alejandro.

   Patruya di San Nicolas mesora a mobiliza pa e area, y aki Polisnan a bin topa cu un quadracer gebolter e manehador riba suela y un cura di cas kibra.

  Mesora a pidi pa ambulance, mirando cu e situacion di e manehador ta serio y ta considera e accident uno grave.

   Un testigo a papia cu prensa, y el a splica cu e tabata bin di pariba, esta riba e caminda di Savaneta y el a mira e motociclista na altura di Lydia’s Kitchen cu e quadracer.  E momento ey por a mira cu e motociclista lo por tabatin problema cu e quadracer.

    Algun rato despues e testigo bayendo su cas, pasando riba e caminda di Sero Alejandro mester baha velocidad, debi cu quadracer a pase cu velocidad halto.  Despues e ta mira cu e manehador a accidenta y tabata mustra hopi serio.

   Paramediconan cu a presenta mesora a cuminsa traha cu ne, y tabata bisto cu urgentemente e mestre yega Servicio di Emergencia na Hospital.  Asina Paramediconan a pidi polis pa escolta nan pa Hospital, debi cu e situacion di e manehador a empeora rapidamente.

   Polis na su turno mester a tene tur e camindanan druk unda e ambulance mester a pasa cera un rato, pa asina e por a yega Hospitaal mas lihe posibel. Pues den un situacion critico e manehador a yega Hospitaal.