Accident na Hooiberg a laga un persona herida

ORANJESTAD (AAN): Tabata Diahuebs mainta alrededor di 11:30 am, cu Polis a ser notifica cu un accident a socede net dilanti di Hooiberg Supermarket riba caminda principal di Santa Cruz pa Oranjestad.

   E prome unidad di Polis di Santa Cruz cu a yega na e adres Hooiberg 93 y a bin nota cu e boksmento ta entre un Box Truck di entrega di agencia Compra NV, y tambe un auto sedan Hyundai Accent color shinishi.

   For di prome bista a nota cu un di e hendenan envolvi a ricibi basta golpi, y asina a core manda pidi Ambulans pa bin check e herido.

   Polis ta bay investiga e accident, basa riba loke testigonan y esnan envolvi a declara, e.o. pa check e cu un di e vehiculonan no a duna preferencia y a ocasiona e accident.

   Ambulans a yega, y a dicidi pa bay cu e herido pa Servicio di Emergencia na Hospital pa wordo mihor examina door di Docter.