Investigacion den pleno desaroyo
ORANJESTAD (AAN): Manera ta corda, tabata siman pasa cu habitantenan na Tarabana a tende desordo den marduga. A resulta cu hende a yega na un cas na Mandolinstraat y tira riba un persona. E caso ey a socede banda di 3:00 am.
For di e dia ey, Polis y Recherche di Oranjestad a sigui investiga e caso aki, y e informacionnan ta drentando den forma positivo. Riba Diabierna, Polis a confirma cu 2 persona mas a keda deteni relaciona cu e caso aki.
E caso mes: Aki ta un resumen corto di e caso aki: Central di polis ta wordo notifica cu un hende homber a wordo tira na Mandolinstraat. Central di polis ta despacha patruya di polis na e lugar di e sucedido como tambe ambulans.
Na yegada di polis ta encontra cu un hende homber di 20 aña di edad cu a wordo tira dilanti su cas na Mandolinstraat. Personal di ambulans ta presenta un rato despues, stabilisa e victima y transporte cu maximo urgencia pa hospital.
Recherche a presenta como tambe team forensico di BFTO pa haci nan investigacion tecnico.
Recherchenan di Oranjestad ta trahando duro y no ta descarta cu lo tin mas detencion den e dianan nos dilanti.
Cuerpo Policial Aruba ta haci un suplica na comunidad cu ken cu sa algo of a wak algo di e caso aki, pa yama e tipline di polis cu ta 111-41. Nan ta garantiza cu bo ta keda anonimo.
