Accident fuerte a cobra bida di motociclista riba Caya Betico Croes

Hoben Denny Leoni a perde su bida

ORANJESTAD (AAN): E prome yamadanan a cuminza drenta banda di 10:30 pm di Diadomingo anochi, indicando riba caminda di Caya Betico Croes for di Playa direccion Cumana, un accident fuerte a caba di socede e momento ey entre un vehiculo tipo Van y tambe un motorcycle, y cu e persona ta seriamente herida net na e pida entrada pa Cayena Mall.

   Mesora Central di Polis a dirigi diferente unidad rumbo pa e lugar aki, y e prome unidad cu a yega a bin haya un motorcycle marca BMW Adventure R1250 GS color preto benta abao, y su dilanti e motociclista abao cu short cora, shirt geel, y su helm color preto.  Esaki ta par di meter for di entrada di studionan di e emisora Hot 103.5 FM, net pabao di The Salon den Cayena Mall.

   Central di Polis a notifica cu Ambulance tambe ta na caminda.  E agentenan a yega cerca di e motociclista abao, pero no tabata haya reaccion di dje.  A pidi pa Ambulance yega cu maximo urgencia.

   Asina a sigui algun minuut, y e motociclista no tabata reaccionando.  Un poco mas dilanti net na e parking di e emisora, a nota cu un Hyundai H1 Van blanco ta staciona cu bastante daño material na e banda robez, cerca di e chauffeur.  Abao riba pida beton di parking, a nota e chauffeur di e Van, kende tambe ta mustra di tin golpi na su curpa.

   Ambulance a yega: Na yegada di e prome unidad di Ambulance, mesora paramediconan a core yega rondona e motociclista, pero nan no tabata nota señal vital.  E ora un otro Paramedico a yega cu aparato pa conecta pa monitor curason, y a conecta esaki.  E aparato no a detecta nada di se؜ñal vital mas na su curpa, y asina a notifica Polis cu tin di bay yama Docter como cu nan no por haci nada mas pa e manehador masculino hoben benta eybao.

   Polis a pidi e ora presencia di Specialista di Trafico, autoridad halto, y tambe pa un Docter wordo manda.  Mientras tanto famianan di e victima a cuminza yega y a desemboca den un momento hopi tristo, caminda algun miembro di famia no por kere loke nan ta mirando cu nan wowo.  Autoridad a purba di papia cu nan, y a busca personal di Bureau Slachtofferhulp tambe.

   Finalmente Dr. Scholten kende ta docter forensico a presenta na e lugar, y a constata morto di e motociclista yama Denny Enmanuel Leoni Davila, naci dia 24 November 2003 na Venezuela, pues tin 21 aña di edad.  Lamentabelmente el a bira e di 7 morto den trafico pa aña 2025.

   Personal forensico di BFTO a yega pa asina documenta tur cos pa Specialista di Trafico.

   Conhuntamente cu Altocomisario Arnhem, tambe funcionario De Mey kende ta hefe di Polis Uniforma, a bin observa e situacion y duna sosten na e lugar di accident.  Un otro Ambulance tambe a yega pa atende e chauffeur di e Van.  Investigacion rond di e causa exacto ta bao investigacion, y e negoshinan eybanda tin varios security camera cu lo por yuda den esaki.

   Un testigo cu tabata presente, a papia cu prensa y el a bisa cu un rato prome cu e accident a socede, el a mira e BMW R1250 GS Motorcycle aki ta moviendo den e area di rotonde di Dadelstraat.  Aki e Motorcycle a bay direccion west, y a stop na Tarabana Food Center cu ta situa panort di caminda net 200 meter pariba di e lugar di accident.  No ta conoci si acaso e motociclista a cumpra algo of no, pero despues a sali bay west direccion Cayena Mall unda el a accidenta.

   Tanto DIARIO y tambe Cuerpo Policial ta manda palabra di profundo condolencia na famia di e fayecido.