Accident cu mucha chikito envolvi riba caminda di Santa Cruz

ORANJESTAD (AAN): Tabata Diasabra mainta pa 11:45 am, cu patruya di Santa Cruz a wordo manda cu urgencia riba e caminda di Santa Cruz pa Playa, net na altura di NAPA Auto Parts pa un accident.

   Polis cu a yega a cera e caminda, debi cu tabatin 2 auto, y 1 pickup meymey di e caretera.

   Tabata trata di un auto compacto Toyota Vitz color shinishi, un auto compacto Nissan March color blanco, y un pickup double cab Chevrolet Avalanche color preto.

   Polis hunto cu personal di aseguro ta bay investiga e accident, y ta parce cu e chauffeur di e Toyota Vitz no a regla su velocidad na tempo, y a bay dal basta fuerte tras di e pickup.  Un Nissan March color blanco tambe a haya tiki sla.

   Debi na e impacto fuerte, chauffeur di e Chevrolet Avalanche a resulta herida posibelmente di whiplash.  Tambe tabatin un mucha chikito di como 2 of 3 aña, cu a wordo controla door di personal di Ambulance, pero no tabata necesario pa bay cu ne.  Polis a carg’e y pone den nan patruya sperando te ora cu e mama por yega pa buske.

   Paramedico di Rapidresponder tabata dunando asistencia na un persona den e Vitz, y despues cu Ambulance a wordo hiba pa Hospital HOH.

   Polis di trafico a presenta hunto cu agencia di seguro.