Impacto fuerte a pone un auto bay kenter riba acera na Piedra Plat

ORANJESTAD (AAN): E ta algo cu bo ta siña na scol, con durante un accident di auto, e energia kinetico (energia di movimento) di un auto,

ta wordo comberti rapidamente den otro forma di energia, segun e ley di conservacion di energia.  Riba Diadomingo anochi, esaki a wordo observa den un accident na Piedra Plat.

   Un Toyota Corolla color shinishi coriendo riba caminda di Paradera pa Santa Cruz, tabata bin cu asina hopi velocidad cu el a djis pasa bay gewoon riba e rotonde banda di Bright Bakery.

   El a sigui bay ariba, y a dal violentamente tras di un Nissan Versa color blanco cu tabata bayendo pariba tambe.  E dalmento cu asina hopi energia, a wordo ‘traspasa’ pa e Nissan, cu a bay den un scual, subi acera banda panort y net dilanti Shum’s Store a ranca un palo di mata, y kenter riba e pad pa cana.

    Algo prome cu 10:00 pm, Central di Polis a ricibi yamadanan, y mesora a manda patruya di Santa Cruz pa e lugar. Na yegada polis a constata un Nissan Versa color blanco cu number A-14741 berdad a kenter riba e acera, otro banda di Pizza Hut.  Bon mes cu no tabata tin hende sea ta jog of cana ariba e pad e momento ey.

   Un poco mas pabou nan a haya e Toyota Corolla color shinishi cu number A-48181 basta kibra parti dilanti.   Polis a haya sa tambe cu e Corolla a djis bula pasa riba e rotonde bay pariba. E impacto tabata asina fuerte cu el a causa cu e Versa a bay dilanti y bay links ranca mata y bolter kedando riba su banda.

   Polisnan papiando cu e chauffeur masculino di e Corolla, a nota cu e tin caracteristica di ta un persona bao influencia.   Nan a lage supla, y e aparato di Alco-Sensor a registra cu oficialmente e ta bao di e limite legal.  A compronde cu e tabata djis 1,0 µg/l bao di e nivel ey, pues e no a wordo deteni.

   Ambulance a yega, y a check tur dos chauffeur, pero ambos tabata OK e momento ey y no tabata necesario pa atende nan.  Polis di trafico tambe a presenta na e lugar.