WVB Boulevard a conoce accident basta violento riba Diasabra anochi

ORANJESTAD (AAN): Diasabra anochi poco despues di 9:00 pm, Central di Polis a manda diferente unidad policial riba e caminda di WVB Boulevard,

riba e pida di Cumana pa Sero Patrishi, como cu yamadanan ta drentando raportando un accident basta serio.

   E prome unidad di Polis cu a yega, a topa cu e accident mas panort di e viaducto di Meiveld.  Dos auto basta kibra para poco leu di otro.  Aki un auto sedan Hyundai Accent color shinishi cu number V-4595 a bay dal violentamente tras di un hatchback Suzuki SX4 color oranje cu number A-20127.

   Velocidad hopi halto posiblemente a hunga un rol, mirando con e Suzuki a kibra patras, despues cu el a worde gedal pa e Hyundai Accent.

   Chauffeur di e Hyundai Accent tabata keha di hopi dolor, y a baha bay drumi riba e separador, unda personal di e prome Ambulance cu a yega a bin dune asistencia.  Despues di un rato, un otro Ambulance a yega pa trata e chauffeur di e Suzuki, aunke e ta mustra mas leve herida.  Tur dos chauffeur ta masculino.

   WVB Boulevard a wordo cera for di e rotonde di Cumana te na paperclip rotonde na Sero Patrishi, mientras cu polisnan di trafico na e lugar por a haci nan parti hunto cu Forensys.

   Chauffeur di e Hyundai Accent a worde hiba pa Servicio di Emergencia na Hospitaal. Takelwagen tabata necesario pa move ambos auto for di e caminda y tambe mester a haci limpi, debi na e partinan di e autonan cu a spart riba caminda.