ORANJESTAD (AAN): Diahuebs otro siman, lo tin e prome Debate Politico di 2021, cu ta wordo organiza pa Camara di Comercio.
Durante un conferencia di prensa teni na KvK, e persona na cabez di e Comision di Debate na Camara di Comercio, esta Wanda Broeksema, a splica cu e prome debate ta Diahuebs 3 di Juni 2021, y e otro lo ta Diahuebs 17 di Juni 2021. Nan ta contento cu tur lider di Partidonan ta interesa pa usa e plataforma aki pa asina por papia di nan programa, pa contesta e preguntanan tambe.
Loke ta bay haci e debate interesante ta cu cada anochi lo tin “3 tanda”.
Broeksema a splica, cu e Tanda #1 ta pregunta di publico cu a wordo graba riba caya. E politiconan e ora ey ta haya chens di contesta nan.
Asina ta bay pa e di Tanda #2, y esaki ta preguntanan cu e werkgroep debatvragen a traha riba dje, hunto cu diferente stakeholders, y topiconan cu ta al caso actualmente.
Tambe tin Tanda #3 cu ta bay pa publico na cas cu ta mirando e debate, y cu por sea yama of manda nan pregunta den forma di texto.
Algo cu e Comision a informa tur politico di antemano, ta cu nan kier pa e Debate 2021 ta uno riba nivel, sin insulto, pa e ora ey publico por haci su escogencia, pasobra esey ta realmente pakico e Debate ta, pa publico cu ainda no sa pa ken ta vota, pa nan haci nan propio escogencia via di e forma cu politiconan ta contesta e preguntanan.
