Debi na e recorte di 12.6%:
ORANJESTAD (AAN) – Pa loke ta trata e proyeccion pa bay dilanti, Minister Presidente a splica cu riba grafico por mira cu enberdad na aña 2020 y 2021, debi na e recorte di 12.6%, e gastonan di personal a baha considerablemente, y den 2022 e ta subi un poco.
E motibo ta cu gobierno tin proyecta pa 2022 pa duna 5% bek, di e 12.6% y na 2023 e lo subi pasobra gobierno tin cu duna henter e 12.6% bek, pasobra lo no tin un base legal, talvez e ora ey, pa continua cu e recorte.
“Pero hasta e ora ey nos ta bao e palabracion di 479 miyon, cu ta e palabracion cu nos tin cu Hulanda, den e protocol cu nos a firma cu nan”, e dignatario a expresa.
E mandatario a menciona cu aworaki, den cuadro di RAft, gobierno ta negociando otro norma di personal, uno nobo cu ta 10% di e DGP y gobierno tin cinco aña pa yega na esaki y e no ta leu di dje tampoco.
“Cu esaki mi kier mustra cu Aruba ta den cumplimento di e palabracionnan haci, y e maneho stipula pa baha gasto di personal. Pero e no ta bay bin di mes. Ta hopi esfuerzo nos a haci y nos tin cu sigui haci”, Minister Presidente a señala.
Seguidamente, e mandatario a pasa palabra pa director di Recurso Humano, señora Omaira Larez, pa e duna un splicacion mas amplio tocante VUT.
