Den cuadro di mehoracion di su servicio
ORANJESTAD (AAN) – Director di ImSan, Dr. Joel Rajnherc, den un conferencia di prensa convoca Dialuna mainta, a duna di conoce cu Servicio di Ambulans ta bay introduci un investigacion, cu nan ta haciendo, bao tur su clientela.
Esaki ta den cuadro pa mehora e servicio cu nan ta brinda na e publico di Aruba. “Den cuadro di nos JCA Accreditation, nos ta purba di duna e miho servicio posible, den tur ramo cu nos ta trahando den dje, aki na ImSan, y esey kiermen specialmente nos departamento di ambulans, unda nos ta e unico na Aruba cu ta brinda e servicio ey 24/7 pa henter nos Isla”, Dr. Rajnherc a expresa.
Seguidamente, Dr. Rajnherk a pasa palabra pa e Hefe di Ambulans, señor Liberato Hoek, ken a bisa cu como departamento di ImSan tambe ta cumpli cu e acreditacion JCA, y parti di esaki ta cu nan mester a haci un sondeo pa cu e servicio cu ambulans ta duna.
“Mi tin cu bisa cu e ultimo 20 añanan, Servicio di Ambulans a conoce un desaroyo hopi grandi, so well riba personal, educacion, y material. Nos ta sigui e mesun nivel di educacion y protocolnan, cu ta un exigencia na Hulanda, pa servicionan di ambulans.
A base di esaki nos ta bay haci un sondeo bao e personanan cu ricibi cuido di ambulans, pasobra nos ta haya cu ta sumamente importante acerca e publico via prensa”, Liberato Hoek a duna di conoce.
Enfermero di Ambulans lo bay acerca e personanan cu a ricibi cuido di ambulans, pa pidie cooperacion pa yuda nos den esaki. “Mi tin cu pone enfasis cu esaki no ta pa pashentnan cu ta instabil. Pues, na momento cu bo ricibi cuido di ambulans e personal aki ta bay pidi bo autorizacion den sentido si bo ta willing pa doemee e sondeo aki”, Hoek a splica.
El a indica cu e pashent lo haya un carchi den cual tin un “QR Code”. “E QR Code aki ora bo scan’e ta hiba bo na e preguntanan di e sondeo. E ta consisti di tres parti. Esun prome ta ora bo yama 9-1-1, despues bo tin e cuido den su totalidad y na final, e momento cu e cuido ta wordo traspasa pa e parti specializa. Pero tambe por tin personanan cu no ta word transporta y e parti aki tambe nos lo haci un sondeo over di dje”, Liberato Hoek a señala.
Esaki no mester wordo yena na momento cu e pashent ta den ambulans sino na momento cu e ta na cas of cu e tin un tempo liber cu por yena esaki. No ta algo obligatorio sino a base boluntario y anonimo. E preguntanan lo ta den cuater diferente idioma, y tin preguntanan unda e pashent por duna su opinion al caso; por ehemplo bisa cu ambulans cu a transporta bo no a hiba bo bek cas, pasobra esaki ambulance no ta haci, tanten bo ta un persona na cama drumi.
“Nos ta pidi cooperacion di e publico pa por fabor yuda nos den esaki. E ta unico manera cu nos por tin un bista y evidencia di con e cuido ta aworaki y cual ta e areanan cu nos tin cu duna atencion na dje”, señor Liberato Hoek, Hefe di Servicio di Ambulans a conclui.
