ORANJESTAD (AAN) — Na e momento culminante pa Aruba na 2020, ora mester a pidi Hulanda asistencia, Prome Ministro Wever-Croes a presenta un Master Plan cu tabata papia di creacion di un fundeshi.
E palabra recuperacion a wordo uza dor di Wever-Croes, mustrando asina riba un periodo di transicion y un futuro planifica pa un generacion cu ta depende di e generacion saliente pa haya informacion di e berdadero historia di Aruba.
Ora nos papia di asuntonan financiero y economico di Aruba, nos mester bolbe na e momento cu Aruba a haya su Status Aparte cu tabata mara na e independencia di Aruba na 1996 cu tabata atrobe na resultado anterior di historia.
Decada 70 a habri, cu despedida di AVP como partido grandi di Aruba despues cu AVP a traiciona e lucha di separacion di Aruba for di Antia Hulandes y acepta e formula di 12-8 cu a duna Curacao derecho di dominio riba Aruba den Staten di Antia Hulandes.
Ora Shon A Eman, tata di Mike Eman a muri, ya AVP tabata den problema serio cu a empeora ora AVP a nenga Betico Croes como lider pasobra e no tabata Eman, pero Croes.
E gran mayoria di Aruba a uni den e lucha di Betico Croes, cu tabata sumamente pisa y cu por a continua solamente como buskeda di Independencia, na cual Hulanda a mara Aruba tambe entrante 1996 como condicion pa haya Status Aparte.
Despues di 1983, Aruba mester a sigui atende cu Hulanda riba realisacion di su futuro despues di e logro di Aruba den e tempo di crisis mundial di petroleo cu a cera cantidad di refineria mundialmente.
Esaki tabata e oportunidad pa AVP a rescata su existencia y a uza e crisis di Lago pa kibra Betico Croes como lider di Aruba. A base di un coalicion, AVP cu tabata contra e lucha cu Betico Croes a hiba, a haya oportunidad di forma e prome Gobierno di Aruba.
AVP a uza e instrumentonan cu el a hereda di Betico Croes pa normalisa e economia di Aruba cu a keda sin refineria pero si un turismo cu ya tabata florece. Sinembargo AVP no a sigui traha riba e negociacionnan cu Hulanda pa futuro estatal.
Na 1986 AVP a cuminsa ehecuta loke el a yama Plan di Rescate y uno di e prome organisacionnan cu a bati na porta di Aruba tabata Interpol, cu a anuncia presencia di Maffia como grupo cu a bin inverti na Aruba.
Angustia a yena Aruba mientras miembronan di loke tabata Maffia Italiano a bandona Aruba na careda. Yamadanan tabata drenta na DIARIO di personanan cu tabata atende cu e “inversionistanan” y a drenta panico ora nan a scucha cu tabata trata di Maffia.
AVP a cuminsa atrae proyectonan pa Aruba pero no a traha riba e base constitucional y negocia cu Hulanda riba asuntonan estatal cu mester a resulta sea den cumplimento di tur garantia pa Aruba como pais independiente den un Mancomunidad como Hulanda por a sigui existi of cu ta scrap independencia pa keda cu Status Aparte, loke lo a habri confiansa mundial den economia di Aruba.
E rescate di AVP no tabata nifica un base pa futuro pero trata na introduci proyectonan a base di exigencia di companianan inversionista cu Aruba tabata para garantia pa placa cu nan inverti.
Futuro di Aruba a tranca pasobra AVP no a atende e realidad cu na 1996 Aruba mester a bira independiente.
Tabata Nelson Oduber como Prome Ministro di MEP cu a gana eleccion di 1989, cu a negocia atrobe cu Hulanda y asina a sigura cu Aruba a keda cu Status Aparte, loke a habri atrobe confiansa di inversionistanan cu a bini cu hotel pero tambe pa bolbe habri e refineria, cu AVP kier a desmantela.
Awe Mike Eman ta bolbe papia di rescate pero ta lubida kico lo a pasa cu rescate, si como Prome Ministro, Nelson Oduber no a logra convence Hulanda pa scrap Independencia cu mester a sigui negocia despues di 1983 pero cu AVP a lubida na 1986 ora a base di trabou di Betico Croes, AVP a forma e prome Gobierno di Aruba.
E experencia di ayera ta haci cu awe DIARIO no kier papia mas di “rescate” cu obviamente ta nifica pa AVP tira un salbabida den laman sin mira con ta rescata salbabida y pais den ola bruto.
