Mucha di 15 aña cu a hinca homber mata condena na 8 luna di prison

Hues a aplica castigo hubenil y bao guia di Reclasering - ORANJESTAD (AAN): Diabierna mainta via video conference, un mucha a wordo haya culpable di a hinca un homber mata riba e anochi di 31 December 2020 pa 1 Januari 2021.

E mucha M.(16), tempo di e lamentable incidente, tabatin 15 aña. Tratamento di e caso tabata cu portanan sera pa prensa y Diabierna tabata e sentencia caminda DIARIO tabata presente.

HINCA HOMBER MATA

   Hues ta haya legalmente proba cu M. a hinca e homber difunto Ras cu un cuchio den pecho cu consecuencia cu el a fayece. Hues a bisa cu e pregunta durante tratamento di e caso tabata, si e mucha M. tabatin intension. Intension kiermen cu e tabata sa kico e tabata haci of tabata sa cu Ras lo por fayece door di loke el a haci.

Na opinion di Hues, e forma con e mucha M. a actua e anochi ey, esta hinca Ras cu cuchio den area di curason, M. mester sa cu esey lo por causa morto. Hues a bisa cu investigacion ta mustra cu e hinca a perfora Ras su curazon cu a causa su morto.

NO TA DEFENSA PROPIO

Hues a sigui bisa cu durante tratamento di e caso tambe a papia cu M. lo a haci’e pa defende su mama y su ruman muher chikito. Hues ta interpreta esaki como defensa propio. El a splica cu, defensa propio solamente ta aplica ora tin un circunstancia caminda ta defende bo mes of un otro e momento ey.           Na opinion di Hues, si mira declaracion di M. su mama y tio y otronan presente, no por mira cu M. mester a defende su mes inmediatamente. Si ta asina cu mama di M. y Ras tabatin un discusion.

            Esnan presente no a mira esaki como un menaza. E tio di M. a intermedia y a calma e discusion un poco y Ras tabata bayendo bek pa su auto ora cu el a wordo hinca door di M. Hues tambe a mustra cu mama di M. a declara na Polis cu e no tabata sinti su mes menaza door di Ras. Hues a conclui cu tur esaki no ta mustra cu M. mester a defende su mes of por a defende su mes. Door di esey no por papia di defensa propio.

APLICA CASTIGO HUBENIL

  Hues a bisa cu pa cu e castigo, el a tene cuenta cu e edad hoben di M. y cu M. tabata pensa cu e tabata defende su mes. Hues ta haya M. culpable di a mata un persona y esey ta castigabel. Hues tambe a tene cuenta cu e tempo ey M. tabatin 15 aña. Segun e ley penal di Aruba, si e mucha no tin 16 aña, no por duna castigo mas cu 12 luna. Ley ta mustra cu un mucha bou di 16 aña, no ta compronde kico el a haci.

NO TIN INSTITUTO PA MUCHA

   Hues a sigui bisa cu e ta tene cuenta cu e raport di Reclasering y e raport di psicologo cualnan a wordo trata den Corte tambe. Reclasering ta conseha, cu mirando cu Aruba no tin instituto hudicial pa hubentud, pa asina obliga e mucha cu e mester haya guia. Hues ta haya esaki lamentable, pasobra tanto Reclasering como psicologo ta haya cu M. mester ayudo. Door cu no tin un institucion y ta dificil pa un hende asina bay Hulanda, ta importante segun Reclasering cu M. ta cay bou guia di Reclasering y guia di psicologo. Esaki, pasobra nan ta mira cu e chens ta grandi, cu si M. no haya e guia necesario, e lo bolbe haci algo mesun cos. Hues a bisa cu e ta sigui e conseho di e raportnan ariba menciona. Ta asina cu Fiscal a exigi 12 luna di castigo y guia obligatorio condicional.

CASTIGO

   Hues a splica cu e ley penal di Aruba ta mustra cu un castigo obligatorio pa sigui tratamento no por ta condicional manera si ta e caso na Hulanda. Hues a bisa cu conciente ley penal di Aruba a scoge pa no duna castigo obligatorio condicional pa sigui tratamento.

   Hues a bisa cu e lo duna un parti di e castigo hubenil condicional pa asina crea e posibilidad pa guia M. Hues a condena M. na e castigo maximo di 12 luna di prison, di cual 4 luna ta condicional cu 2 aña prueba. Na e tempo di prueba, Hues a pone e condicion special, cu M. ta cay bou guia di Reclasering. Tambe cu si Reclasering haya cu M. mester sigui guia di psicologo y un guia pa regla agresividad.

   E sentencia di Hues ta nifica cu dentro di 3 siman, M. lo sali liber. Hues a bisa M. cu ta importante cu M. ta coopera cu Reclasering. El a hala atencion di M. cu si M. no sigui guia di Reclasering, e lo bay 4 luna bek KIA.

Hues a aproba e demanda di daño di famia di Ras cu ta 5200 florin, pa e gastonan di entiero