ORANJESTAD (AAN) – Diahuebs mainta Corte den Promer Instancia a condena e dokter di cas homber A. pa a mishi cu un di su asistente dama.
Tin dos acusacion contra e dokter pa a mishi cu dos asistente dama pero Hues ta haya cu den e caso di e otro asistente, no tin suficiente prueba y a declar’e liber. Door cu pa un di e acusacionnan A. a wordo declara liber, Hues a baha e castigo exigi pa Fiscal.
E acusacionnan contra A. ta cu como dokter di cas a comete actonan inmoral cu un pashent cu tabata su asistente. Esaki a sosode riba 19 Maart 2019. E otro acusacion ta cu dia 7 Februari 2019, A. lo a haci mesun cos cu un asistente. E acusado A. ta para riba cu e ta inocente.
EXIGENCIA FISCAL
Tratamento di e caso tabata 1 di Juli 2021, caminda Fiscal a bisa Hues cu e dos damanan asistente, N. y V. a duna keho pero no tabatin testigo. Fiscal ta haya cu aki ta trata di actonan inmoral cu no por permiti. Den casonan asina mester busca pruebanan di sosten. Na opinion di Fiscal, tin declaracion di partner di ambos. Tin combersacion graba entre e dama N. y dokter A. riba e forma con dokter A. a masashi su lomba, gara su bil y sunshi na su lomba. Fiscal ta haya cu esakinan ta suficiente prueba di sosten cu loke N. ta bisa ta berdad. Pa loke ta V., Fiscal ta haya cu tin suficiente prueba di sosten.
Fiscal, pa cu e castigo, a ta tene cuenta con e asistentenan a keda afecta door di loke dokter A. tabata haci cu nan. E ta haya cu mester duna un aviso pa e dokter no bolbe haci algo asina. El a exigi 150 ora di trabao comunitario of 75 dia sera. Tambe Fiscal a exigi 4 luna di prison condicional cu un tempo di prueba di 2 aña.
Pa loke ta e demanda di daño inmaterial, Fiscal a bisa Hues cu ta fastioso pa calcula un suma pasobra ta dificil pa determina con hende ta sinti. El a pidi pa declara e demanda no admisibel y ta keda e chens pa den un caso civil determina esaki.
NO PROBA UN MISHIMENTO
Diahuebs mainta e acusado A. no a presenta, pero su abogado si. Hues a bisa cu e asistente V., dia 3 April 2019 a bisa cu ora e tabata gebuk pa check cablenan di computer, dokter a bisa lag’e wak si nan ta traha y a gara su bil. A. a bisa cu no ta asina. Hues a mustra cu e hecho cu A. a duna retiro na V. no ta relaciona cu e mishimento sino ladronicia. E dokter di cas A., a mira via spy camera con V.G. a coy su cartera y saca algo pura y despues a pone e cartera bek.
Hues a conclui cu no tin prueba di sosten y pesey ta declara A. liber di e acusacion di a mishi cu bilnan di V.
DOKTER CULPABEL
Pa loke ta e otro acusacion di e dama N., Hues ta haya cu aki si tabatin mishimento y cu e dokter A. a tacha e honor di N. Hues a mustra cu A. a bisa cu a trata N. pa dolor di lomba riba 19 Maart 2019. Hues ta haya cu riba e dia ey, A. a haci actonan inmoral door di a mishi cu N. na su bil y sunshi na su lomba.
Hues a menciona un articulo di ley cu ta cuestiona dokter cu ta mishi cu pashent. N. tabata traha como asistente di A. Hues ta haya cu A. a mishi na forma no adecua cu N. cu ta ser considera como acto inmoral. E ta haya A. culpable di haci actonan inmoral cu N. Hues tuma A. na malo pa esaki.
Pa cu e castigo, Hues a splica cu door cu tin un acusacion cu A., ta wordo declara liber, ta bay duna castigo menos cu Fiscal a exigi. Pa loke ta e demanda di daño di N., Hues a declara esaki no admisibel door di e complicidad y ta laga pa esaki bay caso civil. Door cu e declara A. liber di e otro acusacion, e otro demanda automaticamente ta cay afor.
Hues a condena A. na un multa di 2 mil florin y si e no paga esaki, e lo mester bay 40 dia sera den prison. Hues tambe a condena A. na 80 ora di trabao pa comunidad pero condicional cu un tempo di prueba di 2 aña.
