E castigo ta mara na condicionnan special cu e mucha mester cumpli cun’e
ORANJESTAD (AAN) – Diamars merdia, Corte di Husticia di Aruba a dicta sentencia den e lamentable caso di e mucha mucha E. di 16 aña cu a hinca su opa Alex Tromp di 77 aña mata. E sentencia a tuma lugar via video conference caminda e mucha tabata na KIA mientras cu den sala di Corte tabata Hues, Fiscal, abogado mr. Lejuez, mama di e mucha, su tanta y su rumannan.
ASESINATO OF MATA
Hues a bisa cu mester determina si aki ta trata di un caso di asesinato of mata. Hues a mustra cu Fiscal ta papia di asesinato y abogado ta papia di mata. Hues a bisa cu ta un hecho cu E. a kita bida di su opa. Awor mester determina si E. a planea esaki of door di circunstancia el a haci’e.
MUCHA A PASA DEN HOPI TORMENTA
Na opinion di Hues, for di tratamento di caso ta sali na cla cu dia 6 Januari 2021, den oranan di anochi, E. a hinca mata su opa. Tambe for di investigacion ta sali na cla cu E., durante cu e tabata mas jong, a hay’e confronta cu hopi casonan lamentabel. Tempo e tabata biba serca su padrastro, el a mira con su padrastro tabata maltrata y grita su mama. Esey a conduci cu E. y mama a bay biba cerca e opa. Ta asina cu e opa, tabata hopi malo. E tabata sufri di demencia, o sea ta kere cosnan cu en realidad no ta asina. Door di e enfermedad aki, e opa tabata kere cu su yiu muher, mama di E., tabata su señora. E acusado E. tabata hopi preocupa cu su opa. E opa tabata jaloers riba su yiu muher, mama di E. door cu e ta kere cu ta su señora. E. a confronta hopi gritamento di e opa.
MUCHA KIER A MATA CURPA
Dia 6 Januari 2021, e opa tabata hopi rabia riba e mama di E., kende a sali e anochi ey. Ora e mama a bolbe cas, e opa den su rabia a tira un stoel riba mama di E. E mama tabata spanta y a lock su porta di camber.
Door di tur e situacion aki, E. e anochi ey, kier a mata su mes. Hues a bisa cu e ta tristo pa scucha cu un mucha asina jong kier mata su curpa. Esaki door cu e no por a soporta mas e situacion na cas.
MUCHA A HINCA SU OPA MATA
Hues a mustra cu E. tabata manda mensahe pa un amiga, caminda el a bisa cu e ta bay mata su curpa. Esey a sosode 6 Januari 2021 pa 10.55 di anochi. E momento ey, E. tabata dicidi cu e ta bay mata su mes y a cana bay direccion di camber. Diripiente el a bay riba su opa y hink’e. El a manda mensahe pa e amiga cu el a caba di mata su opa.
Hues a bisa cu durante tratamento di e caso, Fiscal a expresa cu no ta kera cu E. kier a mata su mes. E potretnan cu Polis a saca, no tin marcanan di corta na su pols. Hues a mustra cu e agentenan cu a bay atende e asistencia, a declara cu E. tabatin corta na su pols robez.
For di investigacion di Reclasering ta mustra cu E. tin un 1 aña cu e tabata corta su mes. Esey ta indica cu e tabatin intension di haci algo cu su mes.
NO TA ASESINATO SINO MATA
Hues ta haya cu e situacion na cas a escala asina hopi e anochi di 6 Januari 2021, cu E. tabata den un situacion asina serio cu den su intension di mata su mes, diripiente a dicidi di mata su opa. Hues ta haya cu E. no tabatin suficiente tempo pa pensa kico realmente e kier haci. Diripiente el a haya e gana di mata su opa. Hues a bisa cu psicologo tambe ta mustra cu E. a haya un impulso hopi severo. Na opinion di Hues, esey no por wordo considera asesinato pasobra ningun momento E. a pensa kico e ta haci.
CASTIGO
Hues ta haya E. culpable di a mata su opa. Esaki ta un delito hopi serio. Pa cu e castigo, Hues a tene cuenta cu hopi circumstancianan cu a sosode. Hues tambe a bisa cu E. mes a expresa cu ta duel e masha cu el a mata su opa.
E caso aki a shock henter comunidad. Hues a bisa cu psicologo y psikiatra a constata cu e chens pa E. bolbe haci algo asina ta hopi chikito. Pero ta importante pa E. haya ayudo y guia. psikiatra ta haya cu E. ta menos responsabel pa su actonan. Hues ta haya un castigo combina na su lugar pa asina por laga E. haya e ayudo.
El a tene cuenta cu e edad hopi jong (16). Hues a aplica e ley hubenil di 3 aña di prison di cual 1 aña y 6 luna o sea e mitar, ta condicional cu un tempo di prueba di 2 aña.
Hues a pone condicion special cu durante e 2 aña di prueba, E. ta cay bao guia di Reclasering. Hasta cu esey ta encera guia di psicologo of psikiatra.
