Ministerio Publico a cuminza saca citacion den tiramento policial cu a mata Ayden Lanoy

A dura net 8 luna...

• Investigacion conoci como ‘Caso Caret’ a keda cla
• Ambos Polis lo presenta na November dilanti Hues 

ORANJESTAD (AAN): Tur cos a cuminza riba Diadomingo marduga, di dia 9 di Februari 2025 alrededor di 5:00 am.  Pues mañan lo bira 8 luna pasa cu el a socede.  Polisnan coriendo den area di Bubali tras di un Toyota Vitz hatchback di 5 porta color shinishi.  Polis su storia ta cu e ta coriendo zig-zag, roekeloos, y sin luz cendi.  Nan a cende zwaailicht, pero e chauffeur no a stop.  Asina a start un persecusion cu a desemboca den zona di Madiki Kavel.

   Den Madiki Kavel, cerca di e Compleho di Recreacion di Madiki Kavel, e auto a manera stop como cu el a yega den un caya kizas desconoci.  Loke a sigui despues ta bao investigacion keto bay door di Ministerio Publico, pero diripiente a start tiramento.  Un total di 20 bala a los riba e auto y e hoben Ayden C. Lanoy.

   Di e momento ey, bida a cambia pa famia di e hoben, y tambe pa e bida di e dos agentenan policial.

   Pueblo a reacciona furioso, con a tribi di tira asina hopi contra un hoben cu no tin ni un arma den su man?  Pa colmo un habitante di Madiki Kavel a revisa su security video, y aki a descubri cu e auto di Ayden Lanoy ta core masha bon cu su luznan patras cendi.

   Habitantenan a core sali, y mas agente policial y recherche a yega, y por a mira cu Ayden ta benta abao banda di porta di auto, y tin basta sanger na su curpa.

   E unidad di Ambulance cu a yega na e lugar di sucedido, a core baha pa brinda asistencia na e chauffer, pero mesora nan a bin nota cu e homber hoben aki no tin señal vital mas.  A indica na Polis cu tin di yama Docter pa bin eynan.  Docter Forensico di Cuerpo Policial ta esun cu a constata morto di e chauffeur masculino di Ayden C. Lanoy di 19 aña di edad.  E ta un hoben ehemplar, un empleado balente na Save More na Boegoeroei.  E tin un bon voz y na 2019 mes Ayden a participa den Voz-I-Landia Escolar unda el a canta cu un cancion componi pa e artista Jeon.

  Citacion oficialmente emiti: Pa mas di 8 luna por tende pueblo ta keda reclama di con ta tardando asina hopi cu e investigacion.  Sinembargo riba Diamars mainta, Ministerio Publico a emiti un boletin pa splica un desaroyo nobo den e investigacion aki di ‘Caso Caret’.

   Den un solo palabra, nan ta indica cu e investigacion penal di e tiramento di 9 di Februari 2025, den cual Ayden Lanoy di 19 aña a perde su bida debi na un bala policial, a keda conclui.

   “E dossier ta cla y a wordo comparti. Den e contexto aki Ministerio Publico a manda e citacionnan pa e dos sospechosonan y nan defensa,” ta loke vocero Ann Angela di Ministerio Publico a indica.

   Manera anuncia anteriormente, Ministerio Publico lo persigui e agentenan policial envolvi. Nan ta wordo acusa di complicidad di homicidio.

   E caso lo wordo presenta den Corte den Prome Instancia riba Diabierna 7 di November den un asina yama regiezitting. E caso penal lo no wordo trata den su contenido. Durante e regiezitting hues ta solamente tuma decisionnan tocante e pregunta si tin necesidad pa haci investigacion adicional.

   Segun Ministerio Publico, famia di difunto Ayden C. Lanoy a wordo informa via nan abogado tocante e ultimo desaroyonan aki.