Hues a baha exigencia di Fiscal
ORANJESTAD (AAN): Hues di Corte di Prome Instancia a baha e exigencia di Fiscal di 7 aña di prison na 5 aña di prison pa e hombernan Venezolano J.B.R., J.P.G., A.H.A. y R.J.G., kendenan a worde haya culpabel di posecion di un lote grandi di marihuana y cocaina.
Fiscal a exigi 7 aña di prison pa e grupo: Luna pasa tratamento di e caso a tuma lugar caminda Fiscal a mustra cu Guarda Costa a intercepta e boto dia 23 Februari 2025. A confisca 23 bulto di droga. Investigacion a mustra cu e bultonan tabata consisti di 468 kilo di marihuana y 104 kilo di cocaina.
Fiscal a exigi pa tur cuater sospechoso 7 aña di prison. Tambe el a exigi pa e boto cu 12 jerry can di gasoline keda confisca.
Sentencia: Diabierna mainta, Hues a dicta sentencia den e caso aki. Hues a bisa cu e ta haya legalmente proba cu e grupo aki a importa un lote di droga. Hues a mustra cu e abogado a bisa cu tabatin fayonan haci y mester declara Fiscal no admisibel. Hues ta rechaza esaki. Hues su conclusion di e caso ta cu tur e 4 acusadonan a worde hiba cu cara tapa pa un boto cu 572 kilo di droga.
Hues a bisa cu e boto ta chikito y mirando e cantidad di droga, e 4 acusadonan mester por a wak esaki. Hues ta haya cu e 4 acusadonan mester por tabata sa cu tin un carga ilegal abordo. Na opinion di Hues, viniendo Aruba cu e boto, e acusadonan a tuma e chens cu nan ta forma parti di transporte di droga.
Pa cu e castigo, Hues a bisa cu e ta tene cuenta cu droga ta malo pa salud di hende. Mirando e cantidad di droga, esaki tabata destina pa bende. Droga ta bay compaña cu criminalidad. Hues tambe a tene cuenta cu ta promer biaha cu e grupo aki ta cay den man di husticia.
Castigo: Hues a sigui bisa cu e ta tene cuenta tambe cu den Corte, e grupo a laga mustra cu nan no sa di nada y no kier a tuma responsabilidad.
Hues a bisa cu e no ta haya proba cu e grupo tabata importa droga sino cu e grupo tabata den posecion di e cantidad di droga.
Hues a condena nan tur na 5 aña di prison, kitando e tempo cu nan ta cera den KIA.
