Ademas di prohibicion pa 5 aña no por haci masashi
ORANJESTAD (AAN): Hues ta haya e masahista di inicial C., culpabel cu dia 16 April 2025, el a viola un dama M., durante cu e tabata haci masashi. Hues ta haya cu C. a abusa di e confianza cu e dama a pone den dje. Ta asina cu durante tratamento di e caso luna pasa, C. a admiti di a abusa di e dama M.
Culpabel di a viola dama: Hues a mustra cu e dama victima M. a declara cu inespera C., durante masashi, a hinca dede den su parti intimo. E dama a keda sorprendi y no por a haci nada. Hues ta haya cu esaki, segun ley penal, ta worde considera cu C. a forza e dama.
Hues a sigui bisa cu segun e acusado C., el a sinti disponibilidad di e dama y pesey a haci’e. Na opinion di Hues, e dama M. ningun momento a duna C. permiso pa haci esey.
Hues ta haya cu C. ta culpabel di a viola y tambe mishi na parti intimo di e dama. Hues a sigui bisa cu e acusado C. a abusa di e confianza cu e dama tabatin den C.
Castigo: Hues a bisa cu tabatin penetracion di dede pero no tabatin agresion. E ta keda un caso serio pero segun hurisprudencia, door cu no tabatin agresion fisico, e castigo ta menos.
Hues a condena C. na 3 aña di prison di cual 1 aña ta condicional cu 2 aña di prueba. Ademas Hues a prohibi C. pa eherce su profesion pa 5 aña.
Ta asina cu e dama M. a haci demanda di daño. Hues a declara e demanda material no admisibel. Pa e demanda inmaterial cu ta 35 mil Florin, Hues ta haya cu e dama no a argumenta esey suficiente. Sinembargo Hues ta haya cu e dama merece haya pago pa daño inmaterial y a condena C. na paga 5 mil Florin. Hues a pone tambe e medida di pago y si C. keda sin paga, e lo mester bay 60 dia cera.
