Hues kier haya mas claridad riba denuncia cu tata y welo a abusa di menor di edad

El a pospone e caso pa Hues Comisario interoga testigo

• 
•  

ORANJESTAD (AAN): E homber di edad grandi H.W. di 73 aña, a presenta den Corte pa e caso penal cu Ministerio Publico a cuminsa contra dje. E acusacion di Fiscal contra H.W. ta cu entre 2015 y 2018, e lo a abusa di su nieta menor di 12 aña.

   Den sala di Corte tabatin dos dama sinta y Hues a pidi un di e damanan (un posibel testigo), pa sali te ora e wordo yama pasobra segun ley, un testigo no por ta presente durante tratamento di e caso promer cu e wordo scucha.

   Hues a bisa tanto Fiscal como abogado cu e victima J. no a presenta.

   Na Hues Comisario a resulta cu J. no kier bay duna declaracion den Corte. Hues a bisa cu segun ley, ta un hende cu tin e autorizacion di e mucha y mayor por duna declaracion. Hues a bisa cu e pregunta ta kico mester haci. El a bisa cu hende di Bureau Slachtofferhulp tambe lo por papia pa e mucha.

   Mester haci mas investigacion: Hues a bisa cu H.W. ta para riba cu e no a haci nada. Hues a mustra cu tin testigonan pero 1 di e 3 testigonan ta bisa cu el a tende di J. papia di e caso y e ta bisa cu un biaha so cu e sospechoso H.W. a bis’e cu el a haci’e. Hues ta haya cu e parti aki no a wordo suficiente investiga. E ta haya cu mester tin mas claridad riba e declaracion di e testigo.

   Hues a bisa cu ta importante pa evalua e balor di e testigonan. Na opinion di Hues, si bay trata e caso awor, e chens ta grandi cu tin buraco habri den e caso. Hues a bisa cu H.W. lo por bisa cu e no a haci nada pero e otronan si. Cu e otronan kiermen e tata di J. y e otro welo. Hues a mustra cu e testigo cu ta presente den Corte pa wordo scucha pasobra el a declara na fabor di e sospechoso y na fabor di e victima.

   Pospone caso pa scucha testigo: Fiscal su punto di bista ta, pa scucha testigo. Na opinion di Fiscal, e victima a bisa KZP cu su tata y su opa a haci algo cun’e. E ta haya cu tin posibilidad cu lo haya un hende autoriza pa lesa declaracion di e victima. Abogado mr. Zara cu a ocupa pa mr. Mohamed a bisa cu e no tin nada contra pa pospone e caso.

   E abogado a mustra cu H.W. ya caba tin 7 luna encarcela y e ta haya cu lo por laga H.W. liber pendiente di e caso cu condicionnan stipula pa Hues entre otro cu e no por bay papia cu e victima y famia. Fiscal a remarca cu e interes di H.W. no por ta pisa mas cu e interes di e caso penal. E ta haya cu no por laga H.W. liber.

   Hues a dicidi cu lo pospone e caso. Hues a bisa cu un testigo a bisa cu tanto e tata, e welo y H.W. a haci actonan inmoral. Hues ta haya cu no mester bay interoga e tata y e welo. Hues ta haya cu si mester interoga e testigo cu e bisa cu el a tende di H.W. bisa cu e tambe a mishi cu e mucha. Hues a bisa cu e ta manda e caso pa Hues Comisario pa scucha testigo y Hues lo instrui Hues Comisario kico lo mester interoga e testigo.

   Ademas Hues a instrui Fiscal pa mira si e mucha y e mama no kier bin Corte, pa busca un persona cu ta haya e autorizacion pa por papia pa e mucha y mama. Hues a bisa cu e kier pa mas pronto posibel e investigacion tuma lugar y e caso keda trata. Hues a fiha 13 Juni 2025 pa 8:30 am lo sigui cu e caso. Hues a rechaza e peticion pa laga H.W. liber