Caso a socede den area di scolnan
- Security Camera a divulga tur mentira di e hoben
- Dos autoridad Anti-Narcotica pa casualidad eybanda
ORANJESTAD (AAN): Hues di Corte den Promer Instancia su opinion final, ta cu e hoben C.H. di 19 aña ta culpabel di a purba mata dos hende. Hues a bisa cu e ta preocupa con C.H. ta cana rond cu arma. Hues no a sigui e exigencia di Fiscal sino a baha e castigo.
Fiscal a exigi 7 aña: Dia 6 di Maart 2025 tratamento di e caso a tuma lugar caminda Fiscal a bisa cu dia 19 Juni 2024 mas o menos 2’or di merdia, pa puro casualidad dos miembro di Team di Narcotica di KPA a mira den area di Stadion na Dakota, con dos hoben cu flanel bisti tabata lucha cu un homber lomba sunu y despues nan a core bay.
E homber lomba sunu a subi su auto y core nan tras. No mucho leu, a scucha tiro. E agentenan a bisa cu nan a mira C.H. ta core cu un revolver den man. Na opinion di Fiscal, tin Security Camera Video ta mustra cu ningun momento e glas di e auto, en especial na parti di chofer, a baha. Fiscal a sigui bisa cu C.H. a tira riba e auto y herida e dama Hulandes D. na man. C.H. a tira dirigi y esey a causa cu e dama D. a resulta herida.
Fiscal ta considera esaki, cu C.H. a purba mata. Na opinion di Fiscal, C.H. a tuma e riesgo cu un hende ta resulta herida door di a tira riba e auto. Esey a sosode tambe. Fiscal ta haya legalmente proba cu C.H. a purba mata e dama D. y un homber cu a keda desconoci. Fiscal ta haya cu den e caso aki no por papia cu C.H. a actua den defensa propio. Na opinion di Fiscal, C.H. ta culpable di posesion di un revolver Caliber .38.
Fiscal a bisa cu e tiramento a sosode den cercania di scolnan. El a remarca, kico lo a sosode si e tiramento a sosode algun rato promer ora cu muchanan tabata sali for di scol pa bay cas? Fiscal ta haya cu pa posesion di arma di candela so ta 2 aña di prison. Door di a tira den direccion di hende tin castigo di 6 pa 8 aña. Den e caso aki ta trata di un hoben di 19 aña y ta promer biaha cu e ta cay den man di husticia. Di otro banda ta C.H. a dicidi di cana arma. Fiscal a exigi 7 aña di prison.
Sentencia: Hues a bisa den su sentencia cu C.H. ta wordo acusa di intento di mata door di tira riba auto cu dos persona aden y C.H. tabatin un revolver den su poder.
Hues a bisa cu C.H. a admiti pero abogado mr. Hernandez a haci apelacion riba defensa propio. Segun abogado, e chofer di e auto kier a tira riba C.H. y a baha glas di auto y e ora ey C.H. a tira.
Rechaza defensa propio: Hues a bisa cu e no ta kere e storia ey. Segun Hues riba camera di seguridad, no ta mira cu e glas di auto tabata habri y hasta e parti cu C.H. ta bisa cu e auto tabata tras di un mata, esey tabata un momento hopi cortico pa bisa cu tur esey por a sosode. Hues a bisa cu e ta rechaza e defensa propio.
Hues ta haya C.H. culpable di a purba mata dos hende. E dama Hulandes den e auto, sinta dilanti banda di e chofer, a resulta herida na braza. Hues a sigui bisa cu ademas C.H. ta culpable di posesion di arma.
No tin respet pa bida di hende: Hues ta haya cu C.H. no tin respet pa bida di hende. Hues ta preocupa con C.H. ta cana cu arma rond.
El a bisa cu e tempo ey C.H. tabatin 19 aña. Abogado a pidi Hues pa aplica ley hubenil. Hues a bisa cu e no ta mira motibo pa haci esey.
Castigo di 5 aña di prison: Hues ta haya cu mester tene cuenta cu C.H. ta jong y ta haya cu mester duna C.H. e chens di por drecha su bida. Tambe Hues a bisa cu ta promer biaha cu C.H. ta cay den man di husticia. Hues ta haya cu C.H. ta realiza cu el a haci malo. Hues a condena C.H. na 5 aña di prison.
E potret aki ta di Juni 2024, ora cu relaciona cu e caso aki autoridadnan a core tene un razzia na un cas den Caya Huan Pablo II na Dakota.
