Fiscal ta haya nan culpabel
ORANJESTAD (AAN): Manera DIARIO a publica, Diabierna mainta Hues a dicta sentencia den e caso penal cu Ministerio Publico a cuminsa contra e hombernan Venezolano G.M.G. y A.C.I.
Luna pasa durante tratamento di e caso, Fiscal a exigi pa tur dos 8 aña di prison y cu e boto, pick up, motornan y trailer mester keda confisca.
Hues a baha castigo exigi: Diabierna mainta Hues a bisa cu e ta haya cu A.C.I. a bay como guardia y G.M.G. tabata ayudante den e transporte di droga riba 8 Juni 2024. Hues ta haya cu nan dos ta complice di traficacion di droga y cu A.C.I. tambe ta culpable di e 3 revolvernan y balanan cu a haya scondi den e boto.
Hues a bisa cu ta un cantidad grandi di droga a importa y esey ta un peliger pa salud di hende y ta fomenta criminalidad. En total a haya 379 kilo di marihuana y 335 kilo di cocaina.
Na opinion di Hues, e cantidad di droga aki ta causa daño grandi na seguridad di e isla y comunidad.
Hues a bisa cu no ta tolera cu A.C.I. tabatin 3 arma di candela cu balanan.
Pa cu e castigo, Hues a mustra cu G.M.G. na 2023 a worde condena caba pa transporte di droga. Esey ta haci cu tur dos ta haya e mesun castigo. Hues a condena A.C.I. y G.M.G. na 7 aña di prison, kitando e tempo cu nan ta sera den Prison di KIA.
Ademas di tur esey, Hues a duna ordo pa e boto cu ta mira riba e potret aki, keda confisca. Pues nan lo no haya e boto mas. Tambe a confisca pa semper e Pick-up, e dos Outboard motor Yamaha, y e trailer.
