Desaroyador di proyecto Isla di Oro a perde nan caso di apelacion den Hof

Ta corecto cu Hues a stop tur trabao di construccion

• Victoria pa Parke Nacional Aruba, Stichting Scubblebubbles, Aruba Youth for the Ocean
• Victoria pa Stichting TurtugAruba, Aruba Birdlife Conservation
• Victoria pa Stichting Fundacion Proteccion y Conservacion di Commandeursbaai 

ORANJESTAD (AAN): Corte Superior a dicta sentencia den caso cu e compania desaroyado di proyecto di Isla di Oro, esta J.O.B. Holding & Management VBA a apela contra tanto Fundacion Parke Nacional Aruba, y diferente fundacion local pa proteha naturaleza y animalnan.  Hof a atende tur argumento, y na final a dicta cu e sentencia di Corte di Prome Instancia duna dia 29 di Mei 2024 na Aruba ta keda valido.

   Esey nifica cu JOB Holding & Management VBA a perde nan caso apela.

   E compania aki tin erfpacht riba e cay conoci como ‘Isla di Oro’ net pazuid di Pos Chiquito den lama.  Aña pasa a prepara varios material di construccion, incluyendo un Heavy Equipment tipo Excavator pa bay coba riba e isla.  Mesora Fundacion Parke Nacional Aruba (cu awor ta conoci como Aruba Conservation Foundation) hunto cu algun Fundacion mas cu tin mesun meta nan dilanti, a pidi Hues pa prohibi e compania JOB di sigui haci trabao di construccion tanto ariba y rond di e isla, como cu e ta violando legislacion di proteccion di naturaleza.  Corte di Prome Instancia a duna Fundacionnan rason.   Pero e compania JOB Holding no a keda contento, y a apela e caso.

   Den su peticion na Hof, hunto cu nan argumento, na final e compania JOB Holding ta pidi Corte Superior pa destrui e sentencia di Corte di Prome Instancia.  E fundacionnan tambe a haya chens di duna nan banda di medaya, y ta pidi pa Hof confirma e sentencia, y pa laga e desaroyador di Isla di Oro cubri tur gasto legal.

   Meta pa Bar-Restaurant: Dia 10 di Juni 2025 caba, a tuma lugar e argumentonan oral den Corte na Aruba.  Pa e compania JOB Holding, a presenta e directora señora O. Henriquez, pa Parke Nacional Aruba a presenta T. Lopez, y tambe pa fundacionnan tabatin G. Peterson, tambe R. van der Wal.  Nan a bin cu nan abogadonan, y tres abogado a entrega notanan di defensa.  Prome cu e argumentonan oral aki, ya caba tres otro abogado a entrega nan notanan di defensa via email.

   Fundacionnan a mustra cu nan ta traha pa proteha y maneho di areanan di naturaleza na Aruba.  Pesey mes desde 21 December 2018 tin un Landsbesluit cu a apunta cierto costa di Aruba como areanan protehi di naturaleza.  Despues cu Landsbesluit di 16 April 2019, a apunta Fundacion FPNA como esun cu ta encarga cu e areanan aki.

   E compania JOB Holding riba 17 di Juli 2023 via di compra a obtene e titulo di erfpacht di e tereno di 880 meter cuadra na Pos Chiquito, y conoci como Isla di Oro.  E erfpacht ta valido te 14 Februari 2026.   Den e acta di entrega pa e erfpacht aki na Juli 2023, ta poni bao titulo di ‘Erfpachtsvoorwaarden’ cu e.o. “E destinacion di e compra ta pa pone eyriba un bar-restaurant cu edificionan banda di dje.”

   For di 9 di Maart caba a nota presencia di e Excavator riba e isla, y mesora FPNA a actua legalmente pa stop esaki.  A descubri cu ora cu e compania JOB Holding tabata haciendo e trabao aki, e no tabata dispone di un ‘aanlegvergunning’.  A sali na cla cu dia 27 di Maart 2024 a pidi e permiso ey, pero via decision Ministerial di 26 April 2024 a rechaza esaki.

   Prohibi prolonga erfpacht: FPNA a pidi Corte di Prome Instancia pa prohibi JOB Holding di haci trabao riba y rond di Isla di Oro, y si nan haci esey toch lo tin un suma di placa cu nan mester paga.  Corte di Prome Instancia a prohibi nan di haci trabao riba Isla di Oro, sin cu nan tin un aanlegvergunning.  Si acaso nan haci esey toch, lo tin di paga un multa di 250.000 Florin pa dia, te na un maximo di 10 miyon Florin.

   Den sentencia di Corte di Prome Instancia, a impone un prohibicion tambe pa Gobierno no bay prolonga e erfpacht di Isla di Oro si acaso e condicionnan di destinacion ta contra e stipulacionnan pa cu proteccion di naturalesa.  Pais Aruba no a apela e sentencia ey.

   E compania JOB Holding a purba di indica, cu area di matanan di mangel si ta cay bao proteccion di naturaleza, pero e cay riba cual Isla di Oro ta situa, no ta cay bao leynan di proteccion.  Pero Corte Superior no ta di acuerdo, manera cu Fundacion FPNA a indica claramente den nan contesta.  Pasobra ta mustra cu e area riba cual Isla di Oro ta situa, a wordo apunta como area marina y e mondi di matanan di mangel a wordo apunta como area naturaleza.  E distincion nota importante, mirando cu e detayenan den e ROPV riba e uzo aceptabel paden di e area ta cuadra cu otro.
   E compania JOB Holding a bisa tambe cu e trabao di limpieza cu nan a haci, no ta prohibi a base di ROPV.  Pero Fundacion FPNA a trece detaye dilanti na Hof, cu e trabaonan a ser haci cu un Excavator, y nan a hasta bora buraco riba e isla.  JOB Holding no a logra motiva Corte Superior pakico un Excavator ta riba e isla.

   Sentencia: Na final, Hof a duna Corte di Prome Instancia razon den nan sentencia, pues e decision di Hues ey ta keda valido.  A dicidi cu JOB Holding tin di cubri awor e costo di e caso, cu na banda di Fundacion FPNA ta na 207 Florin Caribense na costo, y 6.000 Florin Caribense na salario di abogado.  Un suma igual ta stipula pa e Fundacionnan, cu JOB Holding tin di paga.