ORANJESTAD (AAN): Diaranson atardi Corte di Husticia a dicta sentencia den e caso sumario cu Otmar Oduber a cuminsa contra Gobierno y tres miembro di Parlamento.
Esaki relaciona cu e decision di Comision Central di Parlamento dia 15 April 2025 cu a dicidi cu Otmar Oduber no por forma parti di delegacion di Parlamento di Aruba pa bay den exterior.
EVALUACION DI HUES
Hues den su evaluacion di e caso ta mustra cu dia 21 Januari 2025, Otmar Oduber a wordo condena na 1 aña di prison di cual 319 dia ta condicional cu un tempo di prueba di 3 aña. Tambe cu Otmar Oduber mester haci 240 ora di trabao comunitario. Otmar Oduber a apela e sentencia aki.
Hues ta mustra cu durante tratamento di e caso di Otmar Oduber, a wordo treci padilanti cu Comision Central di Parlamento, na 2019 a dicidi cu un Parlamentario cu ta sospechoso den un caso penal andando, no por representa Aruba den exterior. E asunto aki a bolbe wordo treci padilanti den Parlamento y dia 15 April 2025, Comision Central di Parlamento a dicidi cu Otmar Oduber no por representa Aruba den exterior. Tambe di banda di Gobierno a wordo mustra cu Gobierno no ta mete den asunto di Parlamento. Ta solamente den casonan extremo Gobierno ta mete y ta haya cu mester declara Otmar Oduber no admisibel.
Hues ta di opinion cu contrario na e ponencia di Otmar Oduber, e no ta haya cu Otmar Oduber ta wordo limita den su derechonan y autoridadnan como Parlamentario.
Hues ta haya cu corectamente, tanto Gobierno como e Parlamentario, a mustra cu Otmar Oduber por ehecuta su derechonan y autoridadnan y cu e ta haciendo esey tambe.
Hues ta mustra cu, e mayoria di Parlamento a dicidi cu Otmar Oduber no por forma parti di e delegacion di Parlamento pa bay den exterior. Hues a bisa cu esaki ta comprendibel, pasobra Otmar Oduber a viola e linea di maneho di Parlamento, door di riba su mesun iniciativa y gasto di PPA, a viaha bay den exterior.
DECISION DI HUES
Hues a declara Otmar Oduber no admisibel den su caso contra Gobierno. Hues ta rechaza e demanda di Otmar Oduber contra e tres miembronan di Parlamento.
