Sentencia den Corte
ORANJESTAD (AAN): Finalmente e dia a yega, y Hues ta haya e hombernan W.E. di 18 aña, y R.M.B-A di 21 aña culpabel di a comete atraco arma riba un pareha turista riba 3 September 2024. Ta asina cu tempo cu nan a comete e atraco arma, W.E. tabatin 17 aña y R.M.B-A tabatin 20. E turistanan: dama M. y e homber B. a bira victima, caminda e homber B. a wordo maltrata na cabez, mientras cu e dama M. a wordo menaza cu un arma. Hues no a confirma e exigencia di Fiscal sino a baha e castigo.
Fiscal a exigi 2 y 3 aña di prison: Luna pasa tratamento di e caso a tuma lugar caminda Fiscal a bisa Hues cu e dama turista M. a declara cu tres homber a bin riba nan y uno a saca arma riba M. y bis’e pa keda keto. E amigo turista, B., a wordo gedal y el a perde conocimento. El a bisa cu el a tende di e dama M. cu el a wordo menaza cu un arma. Fiscal a sigui bisa cu W.E. y R.M.B-A ta bisa cu nan no sa nada di arma.
Fiscal a remarca cu den smartphone di W.E a haya un potret di un arma cu ta un rato promer cu e atraco a sosode. Esey ta haci cu Fiscal ta haya cu a uza un arma. Fiscal a bisa Hues cu e ta haya cu conhuntamente W.E. y R.M.B.A. a haci e atraco cu violencia. El a sigui bisa cu tin imagen di camera di seguridad, caminda ta mira tres homber y tambe tin declaracion di testigo cu ta bisa cu 3 homber a haci e atraco.
Fiscal ta haya hopi serio cu a atraca e pareha turista. El a sigui bisa cu ta un hecho cu e caso aki a haya hopi atencion den prensa. Esaki a conmove comunidad. Na opinion di Fiscal, ta parce cu e dos acusadonan tabata droga y tabata pensa solamente riba nan mes. Fiscal a tuma nan na malo pa loke nan a haci.
Pa cu e castigo, Fiscal a bisa cu e ta tene cuenta cu W.E. tabata 17 aña ora el a haci e atraco y tabatin casonan habri ainda na Ministerio Publico. Fiscal ta haya cu tanto W.E. como R.M.B-A. mester di guia di Reclasering, manera nan mes a pidi. Fiscal a exigi pa W.E. castigo di 24 luna di prison di cual 6 luna ta condicional y cu 2 aña prueba, bou guia di Reclassering. Pa R.M.B-A., Fiscal a exigi 3 aña di prison di cual 6 luna ta condicional cu 3 aña di prueba y bou guia di Reclassering.
Sentencia: Hues a bisa cu e ta haya legalmente proba cu W.E. y R.M.B-A. a haci e atraco arma riba e pareha turista. Pa cu e castigo, Hues a tene cuenta cu e tempo ey W.E. tabatin 17 aña y mester usa e ley hubenil.
Hues a condena W.E. na 1 aña y 6 luna di prison di cual 6 luna ta condicional. E 6 luna condicional ta mara na 2 aña di prueba y bou guia di Reclassering. Hues a condena R.M.B-A na 1 aña y 7 luna di prison di cual 6 luna ta condicional. E 6 luna condicional ta mara na 2 aña di prueba y bou guia di Reclassering.
