Castigo combina pa tiramento durante Jouvert Morning

Homber cu a wordo bati a bay busca arma y tira riba gang

ORANJESTAD (AAN): Corte di Husticia a trata e caso penal cu Ministerio Publico a cuminsa contra e hombernan J.C. y J.L. Fiscal a baha pisa riba e dos hombernan aki, hayando nan culpabel di intento di asesinato y intento di maltrato severo. El a exigi pa J.C., kende ta esun cu a tira, 54 luna(4 aña y 6 luna) di prison y pa J.L., cu ta doño di e arma, 42 luna ( 3aña y 6 luna) di prison di cual 6 luna ta condicional. Hues no a haya proba e intento di asesinato y tampoco e intento di maltrato severo. El a baha e castigo hopi.

TIRAMENTO

E tiramento a sosode 15 Februari 2025, durante Jouvert Morning na San Nicolas. Banda di 6’or di mainta, Polis a wordo notifica di un pelea formal banda di un bar na San Nicolas. A resulta cu J.C. a wordo maltrata pa tres miembro di e gang di Cayenastraat. Ta asina cu despues di e pelea, J.C. a bay na cas di e homber J.L. pa busca e pistol di J.L., un 9 mm, y bay regla cuenta cu esnan cu a bati’e.

   Pa mas o menos 7.50 di mainta, J.C. y J.L. tabata cana den un caya na San Nicolas. Na dado momento e gang tabata bini den direccion contrario y mas dilanti di e gang tabata cana e dama K. Ta asina cu Polis a haya video di camera di seguridad den e caya ey, caminda por a mira cu J.C. a saca arma y e dama K. a hala un banda. Por a mira refleho di e bala ta pasa ariba e dama K. su cabez.

   E dama K. a declara na Polis cu na Jouvert Morning el a topa cu amigonan y nan a cana hunto. Den e caya, J.C. a para su dilanti riba un distancia cortico, saca un pistol y los 2 tiro. E dama K. a kere cu J.C. lo tabata tira riba e otronan su tras pero e tabata tur spanta cu e lo wordo mata.

SOSPECHOSO DETENI DI BIAHA

Agentenan di Polis, cu tabata den vecindario pa cu Jouvert Morning, a scucha tironan y a actua di biaha. Nan a mira J.C. a tira e arma afor. Nan a detene J.C. di biaha y a confisca e arma. Ta asina cu durante interogacion, J.C. a bisa cu e arma ta di J.L. Polis a bay detene J.L. di biaha.

   Durante interogacion di Polis, promer J.C. a declara cu ta e gang a bay riba dje y door di spanto, el a saca e pistol y los 2 tiro di advertencia. Ora Polis a mustr’e e video di seguridad, el a admiti cu el a bay den e caya pa e topa cu e gang y tira riba nan pero un poco mas halto.

FISCAL A BAHA PISA

Fiscal a bisa Hues cu e ta haya cu aki por papia di premedita, pues intento di asesinato y intento di maltrato severo. Fiscal ta haya cu J.C. a tuma e risico cu e por a herida hendenan den e caya. Fiscal ta haya cu J.L. ta complice. Fiscal a exigi pa J.L., cu ta doño di e arma, 42 luna di prison di cual 6 luna ta condicional. Pa J.C. cu a tira, Fiscal a exigi 54 luna (4 aña y 6 luna) di prison.

SENTENCIA

Hues, despues di a scucha defensa di e abogadonan, a dicta sentencia di biaha. Hues a bisa cu e no ta haya proba intento di asesinato y tampoco intento di maltrato severo. Hues tampoco ta haya proba cu J.L. ta complice. Hues a condena J.C. na 24 luna di prison di cual 6 luna ta condicional cu 2 aña di prueba. Hues a condena J.L., como doño di e arma, na 9 luna di prison di cual 2 luna ta condicional cu 2 aña di prueba.