Arma sumanente peligroso ta circula na Aruba
ORANJESTAD (AAN): E homber C.G. (31), ayera mainta a scucha Hues confirma e exigencia di Fiscal di 3 aña di prison. Hues ta haya sumamente peligroso e metrayador AR 15 cu C.G. tabata tira cun’e riba caminda publico. El a bisa cu e ta haya exigencia di Fiscal suave pero teniendo na cuenta cu e otro persona D. cu tabata hunto cu C.G. a wordo condena na 3 aña di prison, e ta bay di acuerdo cu e castigo pa C.G.
DROGA HAYA NA CAS
E acusacionnan cu Fiscal a presenta contra C.G. ta cu riba 24 Januari 2025 e tabatin den su posecion, casi 35 gram di cocaina. Ademas Fiscal a acusa C.G. cu entre 31 December 2024 y 24 Januari 2025 e tabatin un metreyador AR 15 den su poder y a tira cu esaki.
Hues a bisa cu segun e relato di Polis, 31 December 2024, Polis a haci investigacion na cas di C.G. y a haya casi 35 gram di cocaina. Segun C.G., e droga ta pa su propio uso. El a bisa cu e ta pisca anochi y ta usa cocaina pa asina keda lanta. Hues a remarca cu e cantidad ta hopi pa propio uso y tambe Hues a bisa cu Polis a haya sakitonan di plastic chikico. Esey ta crea e sospecho cu ta bende droga. Segun C.G., e ta cumpra un cantidad di cocaina pa dura largo y e sakitonan di plastic, e ta usa ora di pisca.
Hues a bisa cu Polis a haya 2 balansa tambe. Segun C.G., e balansanan e ta usa pa ora e ta traha cu carburetor di brommer, caminda e ta pisa e peikernan.
TIRA CU METRAYADOR
Hues a bisa cu Polis a mira den cellular di C.G. un video, caminda e ta tira cu un metrayador AR 15 cu ta un arma automatic, sumamente peligroso. C.G. a admiti esey. Hues a mustra cu C.G. tabata hunto cu un homber D. den auto y tabatin e metrayador. Segun C.G. e metrayador tabata den auto caba y e tabata bou influencia di alcohol. El a sigui bisa cu nan a dun’e chens pa test e arma. Segun C.G., den su haltura, el a haci e bobedad di tira cu e arma.
Hues a bisa cu segun investigacion, C.G. lo tabata interesa den e arma y a test esaki. Door cu nan tabata pidi 10 mil florin, el a hala atras di e oferta di un Venezolano y un Colombiano. C.G. a nenga esaki.
CONOCI DI POLIS
Hues a mustra cu C.G. ta un conoci di Polis y cu den pasado tin varios condena pa droga y posecion di arma. Segun C.G., e tempo ey e arma no tabata di dje. Hues a mustra cu e tempo ey a condena C.G. pa intento di mata cu arma di candela. Hues a bisa cu ta haya preocupante cu awor C.G. ta tira cu metrayador AR 15, cu ta un arma sumamete peligroso.
FISCAL A EXIGI 3 AÑA DI PRISON
Fiscal a bisa Hues cu e ta haya legalmente proba e dos acusacionnan. Na opinion di Fiscal, C.G. a admiti di tabatin cocaina y e metrayador. Fiscal a mustra cu riba caminda publico, C.G., bou influencia di alcohol a tira 8 biaha cu e metrayador aki.
Fiscal a bisa cu C.G. tin condena pa tiramento y algun caso di droga y arma di candela. El a bisa Hues cu e homber D., cu tabata hunto cu C.G., a haya condena di 3 aña di prison pa e metrayador. Fiscal a bisa cu aunke cu C.G. a wordo haya cu droga, e lo exigi e mesun castigo, esta 3 aña di prison pa C.G.
ABOGADO
Mr. Paesch a bisa Hues cu C.G. a admiti tur cos. E ta referi na decision di Hues.
SENTENCIA
Hues a sera tratamento di e caso y a dicta sentencia di biaha. Hues ta haya legalmente proba e dos acusacionnan. Hues a remarca cu C.G. ta residivista pa droga y arma.
ARMA HOPI PELIGROSO
Hues a bisa cu aki ta trata di un metrayador hopi peligroso. El a bisa cu esaki ta e arma mas gusta cu teroristanan na Merca ta usa den e indicentenan di tiramento, entre otro school.
CASTIGO
Hues ta haya cu e exigencia di Fiscal ta hopi razonabel mirando e seriedad di e caso. Sinembargo, si tene na cuenta cu e homber D. a wordo condena na 3 aña di prison, Hues ta haya e castigo na su lugar. Hues a condena C.G. na 3 aña di prison.
