Caso riba WEB N.V., Elmar, AWWS, ARE y UA
ORANJESTAD (AAN): Riba Diabierna mainta Corte di Husticia a trata e caso sumario cu 15 persona a cuminsa contra e companianan WEB Aruba NV, NV Elmar, Aruba Wastewater Sustainable Solutions NV (AWWS), Aruba Renewable Energy NV (ARE) y Utilities Aruba NV (UA).
E motibo di e caso ta pasobra e 15 personanan, kendenan tin e funcion di Comisario di un di e companianan, a haya carta di retiro dia 11 Juli 2025.
Abogado mr. Braam di Curacao, a representa e 15 personanan mientras cu abogado mr. D. Kock a representa e companianan.
Kita hendenan sin motibo valido: Abogado mr. Braam a bisa Hues cu dia 11 Juli 2025, e companianan a tuma decision di retiro di e grupo. E abogado a mustra cu tin di e personanan, ainda nan periodo di ta Comisario no a finaliza.
El a mustra cu e companianan den nan carta di retiro ta bisa cu door cu no tin confianza den nan mas, a kita nan. Esaki ta door di e Gobierno nobo cu a sinta.
mr. Braam a remarca cu pa motibonan politico a kita e 15 personanan sin cu tin evaluacion riba nan funcion. E abogado ta haya cu esaki ta violacion di 8 diferente articulo di ley entre otro e “Overeenkomst van Opdracht” (OVO). Na opinion di e abogado, no tin motivacion pakico a retira tur e personanan aki. mr. Braam ta haya cu aki e companianan mester a tene nan mes na ley y statutonan y no por ta asina cu pa motibo di color politico ta haci esaki.
E abogado a bisa Hues cu tur e 15 personanan ta profesionalnan y no por ta asina cu ta duna nan retiro sin tin motibonan. E caso aki tin color politico caminda ta kita personanan sin motibo valido. E abogado a exigi pa Hues stipula daño per huicio segun ley.
E abogado a mustra cu tin personanan cu tin contract y cu e contract ta caba te otro aña Juli 2026. El a pidi Hues pa nan keda cu nan funcion. Mr. Braam a pidi Hues pa suspende e decisionnan aki.
No tin motibo di urgencia: Abogado mr. Kock a bisa Hues cu ta incomprendible cu Comisarionan di diferente companianan, ta cuminsa caso contra Utilities N.V. El a mustra cu Utilities ta un accionista den e companianan. E abogado ta haya cu mester declara nan no admisible pasobra tin di e personanan cu no por cuminsa caso contra Utilities N.V.
mr. Kock a bisa Hues cu henter e grupo no tin motibo di urgencia pa cuminsa e caso sumario. Na opinion di e abogado, nan tur tin otro trabao y ta forma parti di Comisariado caminda ta asisti na reunionnan cu ta sosode 1 of 2 vez pa luna.
A para wega politico: Abogado mr. Kock a cuestiona e señalamento cu ta pa motibo politico, a kita e personanan. El a bisa cu ora cu e Gobierno nobo a sinta, e companianan a yama reunion di Comisarionan y diferente persona a entrega retiro. El a mustra cu a suspende Rojer di Utilities Aruba NV door di situacionnan preocupante. A nombra un otro persona cu tin hopi aña di experencia.
- Kock a enfatisa cu no ta asina cu ta nombramento politico sino cu ta e Comisarionan cu a cuminsa caso, tin nombramento politico. El a señala cu durante cu e Gobierno anterior tabata demisionario, a tene reunionnan caminda a nombra Comisarionan y cu forza retroactivo. Esaki a sosode e dia cu formacion di Gobierno a sosode na Maart 2025. E abogado a señala cu e mesun personanan, a worde nombra como Comisario den diferente compania. Esaki ta hinca Gobierno den un situacion no deseabel.
- Kock a bisa Hues cu e ex-minister Tjon mes a expresa cu e no ta haya e nombramento ta na su lugar. mr. Kock a bisa cu segun Statutonan di e companianan, por kita Comisario na cualkier momento. No ta asina cu mester motiva e motibo. El a mustra cu si no tin confianza mas den un Comisario, por kit’e. Na opinion di mr. Kock, e demandantenan ta menciona articulo di ley pa hustifica cu nan retiro no ta husto, pero e ley ey no ta aplicabel na Aruba sino na Hulanda.
Tambe mr. Kock a cuestiona cu un miembro di Comisario di Utilities, Rojer, ta comisario tambe den WEB y e ta demanda 2.6 Miyon Florin di Utilities. E abogado a sigui bisa cu tin Comisario ta exigi 18 luna di salario y mas ainda cu ta suma masha hopi placa.
El a mustra cu tabatin hopi presion di e Gobierno anterior riba director di NV Elmar y WEB Aruba NV pa firma e acuerdo (OVO) promer cu 1 April 2025 cu ta e promer dia di trabao di e Gobierno nobo. E abogado a bisa cu expertonan a conseha e directornan di Elmar y WEB pa no firma. mr. Kock ta haya cu tur e acuerdonan aki no tabata necesario. mr. Kock ta haya cu e acuerdo OVO ta contra ley. E abogado ta haya cu e 15 personanan a ‘traha un sopi di demandanan’ pa mira kico lo bay logra den e caso sumario. E abogado ta haya cu Hues mester declara e demandanan no admisible pasobra no tin motibo di urgencia.
Hues a sera tratamento di e caso y a bisa cu mas tarda 8 October 2025 lo tin sentencia.
