Helen a luci espectacular den su Trahe di Baño

ORANEJSTAD (AAN); Diabierna anochi na Seminole Hard Rock Hotel & Casino Hollywood na Florida, a tuma lugar e anochi preliminar, unda a inclui tambe presentacion den Trahe di Baño.

   Na e ocasion aki, Helen Hernandez di Aruba a subi escenario, den un paso ritmico y corecto, cu bikini color geel cu a briya riba escenario.  E tabata un outfit espectacular, y cu Helen su bista casi constantemente dirigi riba e huradonan pa tin eye-contact, cu su sonrisa.

   Pa 2021, Miss Universe a bin cu un sistema nobo di seleccion pa semifinalistanan, finalista, y di e ganadora principal.  E biaha aki a bin cu e clasificacion ‘random’, y a elimina e seleccion via di gruponan continental mescos cu a socede ultimo biaha.  Tabatin 21 cu ta clasifica.  Di esaki, 20 a wordo escogi pa hurado, y uno via di voto duna via social media oficial di e organizacion di Miss Universe.

   Despues e grupo a wordo reduci na 10, y e concursantenan a presenta den trahe di gala.  Di eynan ta sigui bin cu otro seleccion pa asina keda cu cinco finalista, cu a contesta un pregunta dilanti publico.  Despues di esey, ta escoge esun cu a keda na di cinco lugar, di cuatro lugar, di tres lugar, di dos lugar, y e Miss Universo.