Zury Ruiz ta feliz di a representa Aruba na Egipto

El a sali den Top 21

ORANJESTAD (AAN): Tabata dia 17 di Maart cu e certamen di Miss ECO International a ser teni na Egipto, unda e flamante beyeza Arubano Zury Ruiz di 19 aña di edad a representa e isla cu 45 otro dama hoben di rond mund.  El a logra posiciona su mes den e top 21 finalistanan, lagando Aruba su nomber na halto.

   E certamen a cuminsa oficialmente di dia 7 di maart. Tur dia mester a lanta di 4’or marduga pa drecha, prepara y pa ta representabel tur caminda cu e bay.

Zury for di prome dia caba a causa impacto na Luxor, e.o. durante sesionnan di potret, ora di tour na Luxor, competencia di social media videos unda tur candidata mester a traha un video di nan trip/actividad unda Zury a gana un di e premionan.

   Toch nan tabata dianan basta intenso, lanta hopi trempan prepara su mesun make up y cabey, esaki tabata sosode hunto cu su team na Aruba. Via Whatsapp tabata dicidi riba cua vestuario y look lo bay cun’e segun e schedule pa e actividadnan di dia. Apesar cu Team Aruba no a bay Egipto, tabata lanta tur marduga y yuda Zury cu su preparacion segun e dia ta bay.

   Prome competencia tabata Resort Wear, unda a luci un bunita trahe di baño geel diseña pa Sharlena Clarinda. Y Segundo competencia tabata Talento unda a haci un baile prepara pa Kimberly Vrolijk.

   E preliminar a tuma lugar na Luxor. Aki luci un Eco Dress cual a worde diseña y confecciona door di Indra Stamper, esaki tabata representa Dream Catcher. Un trahe full traha di tela di cortina y jeans recycla, Eco Dress tabata 98% recycla. E mesun anochi a luci un bunita gala dress di Alejandro Fajardo.

   Zury a sera Amistad cu mayoria di e candidatanan y hopi tabata compliment su vestuario, tur dia e tabata op en top bisti y tin dia cambia 3 of 4 paña.  Pa e anochi final mester a haci un biahe di 12 ora den bus pa Cairo.

   Na Cairo tabatin rueda di Prensa eynan Zury a promociona Aruba masha hopi mes y tambe prensa a keda encanta cu Zury su look pa cu e dia ey unda a uza un bunita shimis di Samuel Pantaleon.

   Pa e anochi final ya Aruba tabata orguyoso di e trabao splendido cu Zury a haci na Egipto. Na e comienzo di anchi final Zury a sali den su Trahe Nacional cu tabata representa Aruba su color nan di bandera, esaki danki na Magaly Sanchez y Mandy Sanchez.

   Despues tur candidata a sali den un trahe cocktail oro cu e organisashon a duna nan pa e opening, di biaha a sigui cu e TOP 21, unda e ultimo finalista cu a worde yama pa join e top 21 tabata Aruba. Un momento cu hopi emocion pa Aruba y Zury, ora a scucha nomber di Aruba worde menciona pa e Top 21.

   Aki e 21 finalista nan a Sali den trahe di Gala y aki Zury a sali den un gala espectacular confecciona pa Verena Lian.

   No a logra pa e next ronde Top 10, pero sigur ta hopi satisfecho cu e trabao desplega pa Aruba, un representante cu a hinca tur su esfuerzo y dedicacion pa representa su Isla dignamente lagando Aruba su nomber worde conoci y esaki den solamente 1 luna di preparacion despues di a worde corona Miss Eco Aruba 2022.

   Mester agrega tambe cu hopi pagina nan di miss nan internacional riba Facebook, Instagram y YouTube semper tabata posiciona Zury den Top 10. Y un pagina cu miyones di followers ‘Missosology’ cu ta follow tur e certamen nan grandi di beyeza rond mundo, tambe semper a pone Aruba como e gran faborito nan den top 10. Aki mester bisa cu e doño mes di e pagina aki tabata na Egipto y a sera un Amistad bunita cu Zury y a bisa Zury cu pronto e kier wak e na Miss Universe.

   DIARIO a compronde cu Zury Ruiz tin hopi plan pa futuro y su siguiente paso lo ta riba e pasarela di New York Fashion Week na September venidero.

Di parti Team Aruba y Zury kier a yama danki na tur e sponsor y tur persona cu a yuda di un manera of otro pa den un corto tempo a logra pa representa Aruba dignamente na Egipto